پنجاب دے ٻئے شہراں وچ وی لاہور دے معیار موجب ترقیاتی منصوبے شروع کیتے ویندے پئن، عظمیٰ بخاری

لاہور۔ 24 فروری (اے پی پی) وزیرِ اطلاعات و ثقافت پنجاب عظمیٰ بخاری آکھیے جو لاہور دی خوبصورتی تے ترقی دیاں مثالاں ہݨ پاکستان دے ٻئے شہراں وچ وی محسوس کیتیاں ویندیاں پئن ۔ ہݨ پنجاب دے ٻئے شہراں وچ وی لاہور دے معیار موجب ترقیاتی منصوبے شروع کیتے ویندے پئن ، تے ترقی و خوشحالی دا سفر ہݨ صرف لاہور تئیں محدود نی رہیا۔ اپݨے بیان وچ انھاں مزید آکھیے جو مریم نواز لاہور تے پنجاب دے ٻئے شہراں وچ کہیں وی قسم دی تفریق ختم کرݙتی اے، تے ہݨ ہر شہر وچ صحت، تعلیم تے انفراسٹرکچر دے جدید منصوبیں دا دائرہ پورے پنجاب وچ وسیع کیتا ویندا پئے۔ عظمیٰ بخاری آکھیے جو پہلی واری پنجاب دے عوام دے ٹیکس دا پیسہ دیانتداری تے شفافیت دے نال انھاں دی فلاح و بہبود تے خرچ کیتا ویندا پئے۔ انھاں آکھیے جو پنجاب حکومت دے کھرباں روپے دے ترقیاتی منصوبیں تے کوئی مخالف انڳلی نی چا سڳدا تے پنجاب میرٹ، گڈ گورننس تے ترقی دے لحاظ نال باقی صوبیں وچ ٹاپ پوزیشن تے ہے ۔انھاں زور ݙتا جو ہݨ نہ کوئی ساؤتھ پنجاب، نہ سینٹرل پنجاب، نہ جنوبی پنجاب اے، بلکہ ہک ہی متحدہ پنجاب اے، جیندے وچ ہر شہری ترقی تے خوشحالی دے سفر وچ شامل اے۔ عظمیٰ بخاری آکھیے جو مریم نواز دی قیادت وچ پنجاب دے عوام کیتے شفاف تے موثر اقدامات جاری ہن ، تے ہر منصوبہ عوام دی زندگیاں کوں بہتر بݨاوݨ کیتے ترتیب ݙتا ویندا پئے۔