کابینہ دی اقتصادی رابطہ کمیٹی 5 لکھ میٹرک ٹن کݨک مسابقتی ٻولی دے ذریعے ویچݨ دی منظوری ݙے ݙتی

اسلام آباد۔ 24 فروری (اے پی پی) کابینہ دی اقتصادی رابطہ کمیٹی (ای سی سی) پاسکو دی 500,000 میٹرک ٹن کݨک مسابقتی ٻولی دے ذریعے ویچݨ دی منظوری ݙے ݙتی ۔ کابینہ دی اقتصادی رابطہ کمیٹی (ای سی سی) دا اجلاس وفاقی وزیرِ خزانہ و محصولات سینیٹر محمد اورنگزیب دی زیرِ صدارت منعقد تھئے ۔ اجلاس وچ وزارتِ قومی غذائی تحفظ و تحقیق ولوں پاسکو ݙے موجود 500,000 میٹرک ٹن کݨک دے ذخیرے کوں مسابقتی ٻولی دے ذریعے ویچݨ دی تجویز دا جائزہ ڳھدا ڳئے۔ کمیٹی کوں ݙسایا ڳیا جو پہلے منظور شدہ ریزرو قیمتاں تے کݨک ویچݨ دی سابقہ کوشش موصول تھیوݨ آلی گھٹ ٻولیاں پاروں حتمی شکل اختیار نہ کرسڳی ، موجودہ ذخیرے دی صورتحال تے انھاں تے چاوݨ و ذخیرہ رکھݨ دی لاڳت دے پیشِ نظر ای سی سی 500,000 میٹرک ٹن کݨک کوں فرسٹ ان فرسٹ آؤٹ دی بنیاد تے مسابقتی ٻولی دے ذریعے ویچݨ دی منظوری ݙے ݙتی اے۔ جیندے تحت مقامی کݨک دی نظرِ ثانی شدہ ریزرو قیمت 4150 روپے فی 40 کلوگرام تے درآمدی کݨک دی 3800 روپے فی 40 کلوگرام مقرر کیتی ڳئی۔اجلاس وچ تحلیل شدہ پاکستان پبلک ورکس ڈپارٹمنٹ (پاک پی ڈبلیو ڈی) دے پی ایس ڈی پی منصوبیں کیتے 536 ملین روپے دی تکنیکی ضمنی گرانٹ دی منظوری ݙتی ڳئی ۔ منظور شدہ رقم متعلقہ قانونی تے آئینی تقاضیں موجب مخصوص جاری منصوبیں کیتے حکومتِ پنجاب تے حکومتِ خیبر پختونخوا کوں منتقل کیتی ویسی ۔ اجلاس وچ پٹرولیم ڈویژن ولوں سینیر جیکو پاکستان لمیٹڈ دے نال طے پاوݨ آلے معاہدہ تصفیہ متعلق فیکٹ فائنڈنگ رپورٹ دا خلاصہ وی پیش کیتا ڳئے جیڑھا پٹرولیم لیوی دی ادائیگی وچ تاخیر دے حوالے نال ای سی سی دی سابقہ ہدایات دی تعمیل وچ جمع کرایا ڳیا ہئی اے تاں جو اینکوں ایں مشاہدے دے نال واپس کر ݙتا ڳئے جو اڳلے اجلاس وچ ایں تے مزید جامع بریفنگ پیش کیتی ونڄے۔ اجلاس وچ وفاقی وزیر پٹرولیم علی پرویز ملک، وفاقی وزیر قومی غذائی تحفظ و تحقیق رانا تنویر حسین، وفاقی وزیرِ سرمایہ کاری قیصر احمد شیخ، وزیراعظم دے معاون خصوصی صنعت و پیداوار ہارون اختر خان تے متعلقہ وزارتاں و ڈویژنز دے اعلیٰ حکام شرکت کیتی۔