حکومت دی توانائی شعبے وچ اصلاحات پاروں ملکی تے غیر ملکی سرمایہ کاراں دا اعتماد بحال تھیندا پئے، وفاقی وزیر پٹرولیم علی پرویز ملک

اسلام آباد۔ 25 فروری (اے پی پی) وفاقی وزیر پٹرولیم علی پرویز ملک آکھیے جو حکومت دی توانائی شعبے وچ اصلاحات دے پاروں ملکی تے غیر ملکی سرمایہ کاراں دا اعتماد بحال تھیندا پئے تے پاکستان پٹرولیم و گیس دے شعبے وچ استحکام دے پاسے ودھدا پئے ۔ پاکستان گورننس فورم 2026 دے موقع تے “اے پی پی” نال ڳالھ کریندے انھاں آکھیا اے جو توانائی دے شعبے کوں درپیش بنیادی مسئلے سابقہ حکومت توں ورثے وچ ملئن تاں جو موجودہ حکومت اوکھے تے جرات مندانہ فیصلے کر تے صورتحال کوں بہتر بݨاوݨ دی کوشش کیتی اے۔ انھاں دا آکھݨ ہئی اے جو اڄ ترک پٹرولیم تے آذربائیجان دی سرکاری آئل کمپنی سوکار پاکستان وچ سرمایہ کاری وچ دلچسپی گھندی پئی اے، جیہڑا مارکیٹ دے اعتماد دی نشانی اے۔ وفاقی وزیر آکھیے جو بین الاقوامی ریٹنگ ایجنسیاں تے مالیاتی ادارے پاکستان دے اقدامات کوں مثبت انداز وچ ݙیہدے پئن ۔ آئی ایم ایف پروگرام دے تحت گیس شعبے وچ کراس سبسڈی دا بوجھ گھٹ کیتا ڳئے جݙاں جو سرکلر ڈیٹ دے اصل حجم وچ وی کمی آئی اے۔ انھاں دے مطابق جون وچ گیس سیکٹر دا سرکلر ڈیٹ 1830 ارب روپے ہئی اے جیڑھا گھٹ تھی تے تقریباً 1815 توں 1816 ارب روپے تئیں آ چکے اے تے اڳلی رپورٹ وچ مزید بہتری دی توقع اے ۔ انھاں واضح کیتے جو سرکلر ڈیٹ وچ اڄوکا اضافہ بنیادی قرضے وچ نی بلکہ سود دی ادائیگیاں دے پاروں تھئے کیوں جو ماضی دے جمع شدہ واجبات دی مکمل ادائیگی تئیں سود وچ ودھارا تھیندا رہندے ۔ علی پرویز ملک دا آکھݨ ہئی اے جو حکومت سیاسی سرمایہ داؤ تے لا تے اصلاحات کیتن ، جنھاں دے ثمرات ہݨ سامݨے آوݨ شروع تھی ڳئن ۔ انھاں میڈیا توں اپیل کیتی اے جو او عوام کوں حقائق توں آگاہ کرن تاں جو اصلاحاتی اقدامات دی درست تصویر سامݨے آ سڳے ۔ انھاں آکھیا جے حکومت تے سارے اسٹیک ہولڈرز مستقل مزاجی نال ایں رستے تے گامزن رہیے تاں پاکستان توانائی دے شعبے وچ او مقام ول حاصل کر سڳدے جیندا او عالمی سطح تے حقدار اے