نیب دی وݙی کارروائی، پاکستان ریلوے دی 9.67 ارب روپے مالیت دی زمین چھڑا ڳھدی

اسلام آباد۔ 25 فروری (اے پی پی) قومی احتساب بیورو (نیب) کراچی وݙی کارروائی کریندے ہوئیں پاکستان ریلوے دی 43.11 ایکڑ قیمتی سرکاری زمین چھڑا ڳھدی اے جیندی تخمینہ مالیت 9 ارب 67 کروڑ روپے توں زیادہ ݙسائی ڳئی اے۔ نیب اعلامیے دے مطابق واگزار کرائی گئی زمین کراچی دے علاقے دیہہ کھانٹو، جمعہ گوٹھ وچ واقع اے۔ زمین تے مبینہ طور تے نجی ٹیکسٹائل ملز دا قبضہ ہئی جینکوں تحقیقات دے بعد ختم کرایا ڳئے ۔اعلامیے وچ ݙسایا ڳئے جو ایں معاملے دی انکوائری دا آغاز 13 جولائی 2019 کوں کیتا ڳیا ہئی ۔ بعد وچ سپریم کورٹ دے ہک فیصلے دی روشنی وچ انکوائری عارضی طور تے بند کر ݙتی ڳئی ہئی اے تاں جو 2025 وچ پاکستان ریلوے دی درخواست تے تحقیقات ول شروع کیتیاں ڳیاں ۔ نویں تحقیقات وچ محکمہ مال تے ریلوے دے کجھ افسراں دے کردار دا وی جائزہ ڳھدا ڳیا ۔ نیب حکام دے مطابق بھانویں جو پاکستان ریلوے دی جانب توں اے مؤقف اختیار کیتا ڳیا ہئی اے جو 2021 وچ سپریم کورٹ دے احکامات دے تحت زمین دا قبضہ حاصل کر ڳھدا ڳیا ہئی ، تاں جو حالیہ تحقیقات وچ اے ڳالھ سامݨے آئی اے جو زمین تے نجی فریق دا قبضہ بدستور برقرار ہئی ۔ نیب دی کارروائی دے نتیجے وچ ہݨ مذکورہ 43.11 ایکڑ زمین باقاعدہ طور تے پاکستان ریلوے دے حوالے کر ݙتی ڳئی اے۔ نیب دا آکھݨ اے جو ارباں روپے مالیت دی سرکاری زمین دی واگزاری سرکاری اثاثیں دے تحفظ دے پاسے اہم پیش رفت اے تے ادارہ اڳوں وی قومی املاک تے غیر قانونی قبضیں دے خلاف کارروائیاں جاری رکھیسی