پاکستان دی ترقی وسائل یا محنت دی ڳھٹکی نال نہیں رکی ہوئی، ادارہ جاتی صلاحیت تے گورننس دے مضبوط “تریجھے درجے” دا نہ تھیوݨ ایندی وݙی وجہ اے، وفاقی وزیر احسن اقبال

اسلام آباد۔ 26 فروری (اے پی پی) وفاقی وزیر منصوبہ بندی، ترقی تے خصوصی اقدامات پروفیسر احسن اقبال آکھیا جو پاکستان دی ترقی وسائل یا محنت دی ڳھٹکی نال نہیں رکی ہوئی بلکہ ادارہ جاتی صلاحیت تے گورننس دے مضبوط “تریجھے درجے” دا نہ تھیوݨ ایندی وݙی وجہ اے۔ خمیس کوں “پاکستان گورننس فورم 2026” توں خطاب کریندیں ہوئیں انھاں آکھیا اے جو 24 کروڑ آبادی آلے ملک کوں صرف 1,200 سرکاری دفتراں دے ذریعے چنگے طریقے نال نئی چلایا ون٘ڄ سگدا ۔ جمہوریت کوں اصل معنیاں اچ فائدہ مند بݨاوݨ کیتے اینکوں تلے دی سطح تئیں ودھاوݨا ہوسی، انھاں آکھیا اے جو اساݙی روایت، جیہڑی اسلامی تعلیمات تے مسلم لیڈراں دی میراث توں راہنمائی گھندی اے، عدل، احتساب، مشورے (شوریٰ) تے فلاحِ عامہ دے واضح اصول ݙیندی اے۔ انھاں آکھیا اے جو قیادت دا تصور جیندے تے اج پوری دنیا اچ گالھ تھیندی پئی اے، اصل اچ اسلامی اصولاں اچ ہمیشاں توں موجود رہیے، جتھاں قیادت کوں امانت تے خدمت دا ذریعہ سمجھیا ویندے۔ انھاں ایں عزم دا اظہار کیتے جو پاکستان کوں باہر توں منگوائے ڳئے سانچیاں دی نئی بلکہ آپݨی فکری میراث تے یقین دی لوڑھ اے۔ ایجھی اصلاحات ضروری ہن جیہڑی قومی طاقت کوں کم اچ ڳھن آون، انوکھے چیلنجاں کوں سمجھن تے ایجھے ادارے بݨاون جیہڑے عوام دی خواہشاں دے مطابق ہوون۔ انھاں آکھیا اے جو گالھ مہاڑ شروع تھی ڳئی اے اتے سانجھیاں کوششاں نال ہک ایجھا نظامِ حکمرانی بݨایا ون٘ڄ سگدے جیہڑا اصل معنیاں اچ قومی سنڄاݨ دی عکاسی کرے اتے مستقبل دے تقاضیاں دے مطابق ہووے۔