میری ٹائم سیکٹرکوں جدید بݨاوݨ کیتے حکومت وسیع پیمانے تے اصلاحات کیتن، وفاقی وزیر بحری امور جنید انوار چوہدری دا ’’اے پی پی‘‘ کوں خصوصی انٹرویو

اسلام آباد۔ 26 فروری (اے پی پی) وفاقی وزیر بحری امور جنید انوار چوہدری آکھیے جو پاکستان دے میری ٹائم سیکٹر کوں جدید بݨاوݨ کیتے حکومت وسیع پیمانے تے اصلاحات کیتیاں ہن جنھاں وچ بندرگاہ دی توسیع، جہاز رانی دی جدید کاری، گوادر پورٹ کوں فعال کرݨ، فیری سروسز دا آغاز، میری ٹائم یونیورسٹی دی ادارہ جاتی اصلاحات تے اپ گریڈیشن شامل اے۔ اے ڳالھ انہاں’’اے پی پی‘‘ دے نال خصوصی انٹرویو وچ آکھی ۔ وفاقی وزیر جنید انوار چوہدری آکھیے جو ٻہوں وقتی پاکستان میری ٹائم اکیڈمی کوں ڈگری ݙیوݨ آلی یونیورسٹی وچ اپ گریڈ کیتا ویسی جیندے کیتے ہک ارب روپے خاص طور تے مختص کیتے ڳئن۔ انھاں آکھیے جو ایں حوالے نال ہک چارٹر کیتے ہائر ایجوکیشن کمیشن نال رابطہ کیتا ڳئے۔جنید انوار چوہدری آکھیے جو شکایت سیل، مصنوعی ذہانت (AI) دے انضمام، تربیتی پروگرام تے سی ٹو سٹیل پروجیکٹ جیھے اقدامات نال شفافیت، کارکردگی، صنعت دی ترقی تے روزگار کوں ودھارا ملسی انھاں آکھیے جو نویں اصلاحات دے تحت ہک شکایت سیل بݨایا ویندا پئے جیندے نال شہریاں کوں میری ٹائم آپریشنز، پورٹ مینجمنٹ تے شپنگ پالیسیاں تے شکایات و تجویزاں درج کراوݨ وچ سہولت ملسی ۔ انھاں آکھیے جو شکایات کوں 10 ݙینہاں دے اندر اندر حل کیتا ویسی ۔ انھاں آکھیا جو ایں قدم دا مقصد شفافیت، احتساب تے سٹیک ہولڈرز دی شمولیت کوں مضبوط بݨاوݨ اے۔جنید انوار چوہدری بندرگاہواں دی ترقی کیتے نوجواناں دے آئیڈیاز کوں ترجیح ڈیوݨ، کاروباری بندیاں تے ایس ایم ایز دی حوصلہ افزائی کرݨ دی اہمیت تے زور ݙتا۔ انھاں آکھیے جو سماجی و اقتصادی ترقی کیتے نوجواناں وچ سرمایہ کاری ٻہوں ضروری اے۔ گوادر پورٹ تے ڳالھ کریندے انھاں آکھیے جو اینکوں وقتی ای مکمل طور تے فعال کر ݙتا ویسی ۔ انھاں آکھیے جو وسطی ایشیائی ریاستاں نال سڑک تے ریل رابطے مکمل تھیوݨ دے قریب ہن، ہک واری رابطے دے منصوبیں کوں حتمی شکل ڈیوݨ دے بعد گوادر مکمل طور تے آپریشنل تھی ویسے۔جنید انوار چوہدری درآمدات کوں گھٹ کرݨ، مقامی مینوفیکچرنگ کوں ودھاوݨ، روزگار دے موقع پیدا کرݨ تے ذخیرے کوں مضبوط بݨاوݨ کیتے بندرگاہ دے بنیادی ڈھانچے کوں سٹیل دی پیداوار تے جہازاں دی ری سائیکلنگ نال جوڑیندے “سی ٹو سٹیل” اقدام دا خاکہ وی پیش کیتا اے ۔ انھاں آکھیے جو فزیبلٹی سٹڈی کجھ ݙینہاں وچ مکمل تھی ویسے جیندے نال پیداوار دی راہ ہموار تھیسی اے۔ انھاں آکھیے جو وزیراعظم دے معاون خصوصی ہارون اختر خان دے نال صنعت وچ شپ بریکنگ میٹریل دے استعمال دے حوالے نال تجویزاں شیئر کیتیاں ڳئن۔حکومت دے میری ٹائم سنچری (2047-2147) دے فریم ورک دا خاکہ پیش کریندے جنید انوار چوہدری آکھیے جو اڳلے سو سالاں وچ ترائے نویاں گہری سمندری بندرگاہواں بݨاوݨ دی منصوبہ بندی کیتی ڳئی اے جیندے وچ جہاز رانی دے ٻیڑے دی جدید کاری، جہاز سازی تے ری سائیکلنگ دی سہولتاں، گرین ٹیکنالوجیز کوں اپناوݨ تے انسانی وسائل دی ترقی وچ سرمایہ کاری کرݨ شامل اے۔ انھاں آکھیے جو مصنوعی ذہانت کوں اڳلے سال تئیں پورٹ آپریشنز وچ شامل کر ݙتا ویسی تاں جو کارکردگی ودھ سڳے۔فیری سروسز دے حوالے نال وفاقی وزیر ݙسایا جو قیامِ پاکستان دے بعد توں کوئی فیری سروس لائسنس جاری نہ کیتا ڳیا ہئی، ایں حکومت پہلا لائسنس جاری کیتے، ہݨ مزید درخواستاں زیرِ غور ہن تے وقتی ٻئے لائسنس وی جاری کیتے ویسن ۔ انھاں آکھیے جو کراچی پورٹ ٹرسٹ وچ ہک جدید ترین ٹرمینل بݨایا ڳئے ایندے علاوہ عراق، ایران تے ابوظہبی کیتے خدمات شروع کرݨ دے منصوبے وی جاری ہن ۔ انھاں آکھیے جو وزارت ماضی وچ ٻہوں سارے چیلنجز دا سامݨا کیتا ہئی پر ہݨ ٻہوں سارے مسئلے حل کر ڳھدے ڳئن۔’’اے پی پی‘‘ نال خصوصی ڳالھ مہاڑ اچ انھاں ݙسایا جو میری ٹائم سٹاف کیتے سیمینارز تے ٹریننگ سیشنز دا اہتمام کیتا ویندا پئے جیندے وچ ماہی گیری دی ٹریننگ ݙیوݨ کیتے ہک ہال کوں باقاعدہ طور تے وقف کیتا ڳئے جتھاں ماہی گیراں دے ٻالاں کوں ماہی گیری دے جدید طریقیں دی تربیت وی ݙتی ویندی پئی اے تاں جو معاش کوں بہتر بݨایا ونڄ سڳے۔