اسلام آباد۔ 26 فروری (اے پی پی) چیف جسٹس آف پاکستان جسٹس یحییٰ آفریدی آکھیے جو انصاف تئیں مساوی تے باوقار رسائی ریاست دی آئینی ذمہ واری اے تے عدلیہ ایں مقصد کوں پاوݨ کیتے بار دے نال رل تے جامع تے پائیدار اصلاحات تے عمل کریندی پئی اے۔سپریم کورٹ دے شعبہ تعلقاتِ عامہ توں جاری بیان موجب انھاں بار نمائندیں نال ڳالھ کریندے آکھیے جو ضلعی لیگل ایمپاورمنٹ کمیٹیاں …
انصاف تئیں مساوی تے باوقار رسائی ریاست دی آئینی ذمہ واری اے، چیف جسٹس یحییٰ آفریدی
اسلام آباد۔ 26 فروری (اے پی پی) چیف جسٹس آف پاکستان جسٹس یحییٰ آفریدی آکھیے جو انصاف تئیں مساوی تے باوقار رسائی ریاست دی آئینی ذمہ واری اے تے عدلیہ ایں مقصد کوں پاوݨ کیتے بار دے نال رل تے جامع تے پائیدار اصلاحات تے عمل کریندی پئی اے۔سپریم کورٹ دے شعبہ تعلقاتِ عامہ توں جاری بیان موجب انھاں بار نمائندیں نال ڳالھ کریندے آکھیے جو ضلعی لیگل ایمپاورمنٹ کمیٹیاں (DLECs) کوں موثر بݨاوݨ ویلھے دی اہم لوڑھ اے تاں جو عام شہری خاص طور تے تریمتاں تے کمزور طبقیں کوں فوراً تے معیاری قانونی رہنمائی ݙتی ون٘ڄ سڳے۔چیف جسٹس ݙسایا جو 2025-26 دے اصلاحاتی پروگرام دے تحت عدالتی عمارتاں دی سولرائزیشن، ای لائبریریاں دے قیام، تریمتاں کیتے سہولتی مرکزاں دے قیام تے صاف پاݨی ݙیوݨ جیھے منصوبیں کیتے ملک وچ فنڈز رکھئے ڳئن جنھاں توں بنچ تے بار ݙوہیں فیدہ چیسن ۔ انھاں دا آکھݨ ہئی جو آوݨ آلے مالی سال وچ ویمن فیسیلیٹیشن سینٹرز دی اپ گریڈیشن کوں ترجیح ݙتی ویسی جݙاں جو بار کونسلز دی مفت قانونی امداد کوں ہک مربوط نظام دے تحت ضلعی کمیٹیاں دے نال جوڑ ݙتا ویسی، ایں مقصد کیتے سپریم کورٹ وچ ہک خاص ہیلپ لائن وی بݨائی ویسی جتھاں نامزد پروبونو وکلاء شہریاں کوں قانونی مشورہ ݙیسن ۔جسٹس یحییٰ آفریدی مزید آکھیے جو نوجوان وکلاء دی پیشہ وارانہ تربیت کیتے فیڈرل جوڈیشل اکیڈمی دے زیرِ انتظام آن لائن بار ووکیشنل کورس شروع کیتا ویندا پئے تاں جو قانونی پیشے وچ مہارت، معیار تے عوامی اعتماد کوں ودھایا ونڄ سڳے۔
