رمضان پیکیج سانڳے مستحق خانداناں کوں 38 ارب روپے امداد ڈیجیٹل والٹس توں ݙتی ویندی پئی اے، وزیراعظم

اسلام آباد۔ 26 فروری(اے پی پی) وفاقی حکومت دے 38 ارب روپے نال ملک دے سب توں وݙے رمضان پیکیج دے تحت 12.1 ملین مستحق خانداناں کوں 13 ہزار روپے فی خاندان دے حساب نال امدادی رقم ڈیجیٹل والٹس توں ونݙی ویندی پئی اے، ہݨ تئیں 64 فیصد مستحقین کوں امدادی رقم مل چکی اے۔ اے ڳالھ وزیراعظم محمد شہباز شریف اسلام آباد اچ رمضان ریلیف پیکیج سانڳے تھیوݨ والے جائزہ اجلاس دی اڳواݨی کریندے آکھی۔ وزیراعظم آکھیے جو پچھلے سال دی پنڄ ہزار روپے دی امدادی رقم ودھا تے 13 ہزار فی خاندان کر ݙتی اے تاں جو مستحق خانداناں دی رمضان دے بابرکت مہینے اچ مناسب مالی مدد تھی سڳے۔ انھاں آکھیا جو اے ملک دا سب توں وݙا اتے جامع رمضان ریلیف پلان اے، پچھلے سال دے کامیاب تجربے دے بعد وزیراعظم رمضان ریلیف پیکیج 2026 دی ونڈ وی ایں شفاف ڈیجیٹل نظام توں کیتی ویندی پئی اے۔ انھاں رمضان پیکیج کیتے کم کرݨ والے متعلقہ اداریاں دی کارکردگی دی تعریف کریندے آکھیے جو ڈیجیٹل والٹس توں مستحق بندیاں کوں رقم ݙیوݨ ٻہوں شفاف اتے سوکھے ڈیجیٹل نظام دے تحت کیتی ویندی پئی اے جیندے نال لوکاں دی لمبیاں قطاراں توں جان چھٹی اے اتے انہاں دا وقار وی بحال راہندے۔ اجلاس کوں ݙسایا ڳئے جو ایں سال 8 رمضان المبارک تئیں 64 فیصد مستحق بندیاں تک رقم پڄ چکی اے، ودھ مستحقین کیتے جانچ پڑتال دا عمل تیزی نال جاری اے۔ ایں سال 12 بینک اتے فنانشل ٹیکنالوجی دیاں کمپنیاں رقم دی ونڈ اچ حکومت دیاں شراکت دار ہن۔ رمضان پیکیج دا دائرہ کار پورے ملک بشمول گلگت بلتستان اتے آزاد جموں و کشمیر تئین کھنݙا ݙتے۔