وفاقی وزیرڈاکٹر مصدق ملک نال جرمنی دی وفاقی جمہوریہ دی پاکستان وچ تعینات سفیر اِنا لیپل دی ملاقات

اسلام آباد۔ 27 فروری (اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک نال جرمنی دی وفاقی جمہوریہ دی پاکستان وچ تعینات سفیر اِنا لیپل ملاقات کیتی، جیندے وچ سفیرِ جرمنی موسمیاتی اقدامات دے ودھارے تے صوبیاں دے نال مؤثر ہم آہنگی تے وزارتِ موسمیاتی تبدیلی دی کوششاں دی تعریف کیتی ۔ ترجمان وزارتِ موسمیاتی تبدیلی موجب اِنا لیپل جرمنی تے وزارتِ موسمیاتی تبدیلی وچال جاری تعاون متعلق ݙسایا، بالخصوص جرمن ترقیاتی ادارے جی آئی زیڈ دے ذریعے جاری مختلف منصوبہ جات تے تفصیلی بریفنگ ݙتی۔ انھاں شعبیں وچ موسمیاتی موافقت تے لچک، اخراج وچ کمی دی حکمتِ عملی، استعداد کار وچ ودھارا، گرین اقدامات تے پائلٹ منصوبیں دی تیاری شامل ہن، جنھاں دا مقصد پاکستان دے موسمیاتی ردِعمل دے نظام کوں مضبوط بݨاوݨ اے۔ سفیر وزارتِ موسمیاتی تبدیلی دے نال زیرِ غور ہک مجوزہ منصوبے CISTA دے بارے وی ݙسایا۔ اے منصوبہ جرمنی دی وفاقی وزارتِ ماحولیات دی طرفوں کمیشن کیتا ڳئے، جیندا مقصد مربوط موسمیاتی خدمات دے قیام تے ڈیٹا مینجمنٹ دے نظام کوں مستحکم بݨاوݨ اے تاں جوشواہد تے مبنی پالیسی سازی کوں ودھارا ݙتا ونڄ سڳے ۔ ڈاکٹر مصدق ملک پاکستان دے موسمیاتی ایجنڈے وچ جرمنی دے مسلسل تعاون تے شراکت داری دی تعریف کیتی۔ انہاں CISTA منصوبے دا خیرمقدم کریندے ایندی مؤثر تکمیل کیتے ڈیٹا دے انضمام تے معلومات دے تبادلے تے مبنی مشترکہ ورکشاپ دے انعقاد دی تجویز پیش کیتی۔ ملاقات وچ ݙوطرفہ تعاون دے دائرہ کار کوں مزید وسعت ݙیوݨ تے وی ڳالھ تھئی، جیندے وچ مشترکہ تحقیقی پروگراماں دا آغاز، طلبہ و اساتذہ دا تبادلہ، تے ڈیٹا شیئرنگ و ادارہ جاتی اشتراک کوں مضبوط بݨاوݨ دے اقدامات شامل ہن۔