بھارت ہووے یا افغان طالبان رجیم،سلھ دا جواب پتھر نال ݙتا ویسی، وفاقی وزیر داخلہ محسن نقوی

اسلام آباد۔ 27 فروری (اے پی پی) وفاقی وزیر داخلہ محسن نقوی آپریشن ’’سوئفٹ ریٹارٹ‘‘ دے 7 سال مکمل تھیوݨ تے پاک فضائیہ دے بہادر شاہیناں کوں شاندار الفاظ وچ خراجِ تحسین پیش کریندے آکھیے کہ 27 فروری پاک فضائیہ دی تاریخ دا سنہری باب تے ساݙی قومی جرات و عسکری مہارت دا تاریخی ݙینھ اے۔ اپݨے خصوصی پیغام وچ محسن نقوی آکھیا 27 فروری 2019 کوں پاکستانی شاہیناں ازلی دشمن بھارت دی جارحیت دا جیڑھا منہ بھن جواب ݙتا، اوں دنیا تے ثابت کر ݙتا جو پاکستان دا دفاع ناقابلِ تسخیر اے۔ انہاں آکھیا پاک فضائیہ دی مربوط کمانڈ، وقتی انٹیلی جنس تے درست ہدف بندی ثابت کیتا ساݙی آپریشنل تیاریاں دشمن توں کتھائیں برتر ہن تے ایں مہارت پاروں دشمن دی فضائی طاقت دا غرور ملیا میٹ تھیا۔ وفاقی وزیر داخلہ آکھیا اڄ 7 سال بعد دشمن نویں روپ وچ حملہ آور تھیندا پئے۔ انہاں سخت لہجہ اختیار کریندے آکھیا بھارت تے افغان طالبان رجیم دے تانے بانے آپت وچ ملدن تاں جوہݨ افغان طالبان دی فتنہ انگیزی تے انھاں کوں سلھ دا جواب پتھر نال ݙتا ڳئے۔ محسن نقوی واضح آکھیا پاکستان اپݨی سرحدی حدود تے قومی خودمختاری دے دفاع دی مکمل صلاحیت رکھیندے ایندا ہر صورت تحفظ یقینی بݨایا ویسی۔  وفاقی وزیر ایں عزم دا اعادہ کیتا قوم پاک فضائیہ دے شاہیناں دی بے مثال جرات تے انھاں دے تاریخی کردار کوں ہمیشہ یاد رکھیسی