پاکستان دی قربانیاں دا صلہ دشمن دی سہولت کاری دی صورت اچ ملݨ کہیں صورت قبول کائنی، وزیر دفاع خواجہ محمد آصف

اسلام آباد۔ 28 فروری (اے پی پی) وزیر دفاع خواجہ محمد آصف آکھیا جو پاکستان دی قربانیاں دا صلہ دشمن دی سہولت کاری دی صورت اچ ملݨ کہیں صورت قبول کائنی۔ وزیر دفاع افغان قیادت کوں او ویلھا یاد ݙیوائے جݙاں پاکستان نہ صرف انھاں دی جنگاں دا بوجھ چاتا بلکہ ݙہاکیاں تئیں انھاں دی میزبانی وی کیتی۔ جمعہ تے ہفتہ دی وچلی رات ’’ایکس‘‘ تے آپݨے سنیھے اچ وزیر دفاع حقانی صاحب کوں مخاطب کریندیں ہوئیں آکھیا جو ماضی دی جنگاں اچ سوویت یونین دے خلاف پاکستان دل و جان دے نال تساں دے نال کھڑا ہئی۔ تساں اساݙے مہمان رہیے، اساں تساں دے خانداناں دی ݙہاکیاں تئیں مہمانداری کیتی۔ لکھاں مہماناں اچوں لکھاں ہݨ وی پاک سرزمین تے پناہ گزین ہن تے اساݙی پاک مٹی توں رزق کمیندن، تساں وی بمعہ خاندان اساݙے مہمان رہیے ہاوے، سوویت یونین دے خلاف اساں رل تے جنگ لڑی، تساں دا تے ساݙا ہک ہی ہدف ہئی۔ انہاں آکھیا جو ہݨ آ ونڄو 9/11 دے بعد دے حالات تے، اساں تے امریکا دا مستقل الزام رہیا جو اساں ’’حقانی نیٹ ورک‘‘ دے سہولت کار ہیسے اتے انھاں دی اعانت کریندوں۔ اساں توں تساں دا پتہ پچھیا ویندا ہئی، کجھ یاد اے تہاکوں؟ اساں تے تساں دی سہولت کاری دا او الزام سچ ہئی یا کوڑ، ایہ ہݨ تساں ہی دنیا کوں ݙس ݙیو۔ انہاں آکھیا جو جیڑھی نسبت نال تہاکوں ’’حقانی‘‘ پکاریا ویندے، او ٻہوں عظیم بزرگ ہن، گھٹ توں گھٹ ایں ناں دی ای لاج رکھ گھنو، اساں تساں توں کجھ وی کائنی منگدے، تساں آپݨے گھر راضی رہو، اساں آپݨے گھر راضی رہوں، اساݙے دشمن کوں بے شک آپݨے گھر وساؤ، پر انھاں دے نال رل تے اساݙے خلاف دشمن دا کردار ادا نہ کرو، آپݨی سرزمین اساݙے خلاف استعمال نہ تھیوݨ ݙیو، اساݙی روایت، ثقافت تے دین اساکوں ایہو سکھیندے جو جئیں گھر اچ پناہ گھدی ہووے، اوندی خیر منگیندی اے۔ اللہ اکبر، پاکستان زندہ باد۔