ہیلتھ کیئر منصوبے دے ذریعے تھیلیسیمیا جیھاں موروثی بیماریاں روکݨ ، گھٹ لاڳت تے درست تشخیص ممکن بݨایا ونج سڳسی، وفاقی وزیر سید مصطفیٰ کمال

اسلام آباد۔ 2 مارچ (اے پی پی) وفاقی وزیر صحت سید مصطفیٰ کمال آکھیے جو حقیقی معنیں اچ ہیلتھ کیئر دا مقصد لوکاں کوں بیمار تھیوݨ توں بچاوݨ اے، ایں منصوبے دے ذریعے تھیلیسیمیا جہیاں موروثی بیماریاں روکݨ ، گھٹ لاڳت تے درست تشخیص دی فراہمی کوں ممکن بݨایا ونج سڳسی۔ اے ڳالھ انہاں ہک اہم اجلاس دی صدارت کریندے آکھی۔ اجلاس اچ چیف ایگزیکٹو افسر نیشنل انسٹی ٹیوٹ آف ہیلتھ، چیف ایگزیکٹو افسر ڈرگ ریگولیٹری اتھارٹی آف پاکستان (ڈریپ) تے سپیشل سیکرٹری ہیلتھ وی شرکت کیتی۔اجلاس دے دوران سی ای او نیشنل انسٹی ٹیوٹ آف ہیلتھ نیشنل ہیومن جینوم پراجیکٹ دے خدوخال، مقاصد تے ایں دی قومی اہمیت تے تفصیلی بریفنگ ݙتی۔ بریفنگ اچ ݙسایا ڳیا جو اے منصوبہ پاکستانی آبادی دے منفرد جینیاتی خدوخال کوں سمجھݨ اچ اہم کردار ادا کریسی۔ وفاقی وزیر مصطفیٰ کمال آکھیا جو نیشنل ہیومن جینوم پراجیکٹ ملک کیتے جینومک خودمختاری دے حصول اچ کلیدی سنگِ میل ثابت تھیسی۔ انھاں ہدایت کیتی جو نیشنل انسٹی ٹیوٹ آف ہیلتھ ماہرین دے اشتراک نال ہک جامع عملی حکمتِ عملی مرتب کرے تاں جو مستقبل نیڑے اچ پاکستان دے عوام جدید جینیاتی طبی سہولتاں توں مستفید تھی سڳن۔ وفاقی وزیرایں عزم دا اظہار کیتا جو عوام کوں بیماریاں توں بچاوݨ کیتے خصوصی توجہ ݙتی ویندی پئی اے تے صحت دے شعبے اچ جدید سائنسی بنیاداں تے اصلاحات دا عمل جاری رکھیا ویسے۔