خطہ تے مشرقِ وسطیٰ اچ کشیدگی تے جنگ دی صورتحال دے تناظر اچ مشترکہ لائحہ عمل بݨا تے اتفاقِ رائے نال اڳوں ودھݨ دی لوڑھ اے ، وزیراعظم کل سیاسی رہنماواں کوں سݙئے، اعظم نذیر تارڑ

اسلام آباد۔ 3 مارچ (اے پی پی) وفاقی وزیرِ قانون و انصاف اعظم نذیر تارڑ آکھے جو خطہ تے مشرقِ وسطیٰ اچ کشیدگی تے جنگ دی صورتحال دے تناظر اچ مشترکہ لائحہ عمل بݨا تے اتفاقِ رائے نال اڳوں ودھݨ دی لوڑھ اے ، وزیراعظم کل سیاسی رہنماواں کوں سݙئے۔ قومی اسمبلی اجلاس اچ مولانا فضل الرحمان دے نکتہ اعتراض تے وفاقی وزیر ݙسایا جو وزیراعظم خطہ تے مشرقِ وسطیٰ دی صورتحال دے تناظر اچ کل سیاسی رہنماواں کوں سݙئے تے ایندا مقصد وی ایہو اے جو ہک دفعہ رل ٻہہ تے مشترکہ لائحہ عمل طے کیتا ونڄے۔انھاں آکھیے جو اے سنجیدہ معاملہ اے، خطے اچ کشیدگی دی صورتحال اے، ایران ساݙا ہمسایہ اے تے اوندے نال ساݙے پراݨے تعلقات ہن مگر اوندے نال نال سعودی عرب تے ٻئے خلیجی ملکاں نال وی ساݙے برادرانہ تے پراݨے تعلقات قائم ہن، سعودی عرب دے نال پاکستان دا تعلق مثالی اے تے ݙوہائیں ملکاں وچال دفاعی معاہدہ وی موجود اے، ایں کیتے اے صورتحال سنجیدگی دی طالب اے۔ انھاں آکھیا جو وزیراعظم انھاں کوں ذمہ واری ݙتی اے جو سیاسی رہنماواں دے نال رابطے استوار کیتے ونڄن تے رل ٻہہ تے اتفاقِ رائے تے مشاورت نال لائحہ عمل طے کیتا ونڄے۔ انھاں آکھیا جو رانا ثناء اللہ ذاتی طور تے سیاسی رہنماواں کوں سݙیندے پئن، مولانا ساݙے وݙے ہن تے معاملات کوں سمجھدے وی ہن، اساکوں امید اے جو او کل دے اجلاس اچ شریک تھیسن، کل ساڈھے 11 وڄے اِن کیمرہ اجلاس تھیسی، ایندے اچ جیڑھیاں وی تجویزاں ہوسن تے جیڑھا وی لائحہ عمل طے تھیسی اوں موجب اڳوں ودھسوں۔