چیئرمین سینیٹ سید یوسف رضا گیلانی نال زرعی ترقیاتی بینک لمیٹڈ دے صدر طاہر یعقوب بھٹی دی ملاقات

اسلام آباد۔ 3 مارچ (اے پی پی) چیئرمین سینیٹ سید یوسف رضا گیلانی نال زرعی ترقیاتی بینک لمیٹڈ دے صدر طاہر یعقوب بھٹی پارلیمنٹ ہاؤس اچ ملاقات کیتی۔ ملاقات دے دوران ملک دے زرعی شعبے دی مجموعی صورتحال، کساناں کوں درپیش چیلنجز تے زرعی ترقی دے ودھارے کیتے جاری اقدامات تے تفصیلی ڳالھ مہاڑ کیتی ڳئی۔ صدر زرعی ترقیاتی بینک لمیٹڈ چیئرمین سینیٹ کوں بینک دی طرفوں کساناں تے زمینداراں کیتے متعارف کرائے ڳئے قرضہ جات پروگراماں تے بریفنگ ݙتی۔ انھاں ݙسایا جو بینک سوکھیاں شرطاں تے مالی سہولتاں تے مختلف ریلیف پیکجز ݙتا ویندا پئے تاں جو زرعی پیداوار اچ ودھارا کیتا ونڄ سڳے۔انھاں ݙسایا جو جدید تقاضیں موجب بج، کھاد، زرعی مشینری تے ٻئے ضروری زرعی اخراجات کیتے کساناں کوں وقتی مالی معاونت ݙتی ویندی پئی اے جیندا مقصد زرعی شعبے کوں مستحکم بݨاوݨ اے۔انھاں چھوٹے کاشتکاراں تے درمیانے درجے دے زمینداراں کیتے متعارف کرائی ڳئی خصوصی سکیماں توں وی آگاہ کیتا۔ انھاں سکیماں دے تحت سوکھیاں قسطاں، گھٹ شرحِ منافع تے شفاف طریقہ کار دے ذریعے قرضیں دی فراہمی یقینی بݨائی ویندی پئی اے تاں جو ودھ توں ودھ کسان فیدہ چا سڳن۔ انھاں اقدامات نال نہ صرف کساناں کوں براہِ راست فیدہ پڄسی بلکہ قومی معیشت اچ زراعت دے کردار کوں مزید تقویت ملسی۔چیئرمین سینیٹ سید یوسف رضا گیلانی زرعی ترقیاتی بینک لمیٹڈ دی کوششاں کوں چنڳاں قرار ݙیندے آکھیے جو زراعت پاکستان دی معیشت دی ریڑھ دی ہݙی اے تے کساناں کوں ریلیف ݙیوݨ قومی ترجیح اے۔ انھاں ایں عزم دا اعادہ کیتا جو پارلیمنٹ کسان دوست پالیسیاں تے زرعی شعبے دی ترقی کیتے ہر ممکن تعاون جاری رکھیسی۔ انھاں مزید آکھیا جو زرعی ترقیاتی بینک لمیٹڈ ملک اچ زرعی خوشحالی، دیہی ترقی تے غذائی تحفظ دے ودھارے اچ کلیدی کردار ادا کریندا پئے، کساناں کوں مالی طور تے بااختیار بݨا تے اے ادارہ قومی ترقی اچ نمایاں حصہ پیندا پئے۔ چیئرمین سینیٹ ایں ڳالھ تے زور ݙتا جو غریب تے مستحق کساناں کوں ودھ توں ودھ ریلیف ݙتا ونڄے تاں جو انھاں دی مالی مشکلات گھٹ کیتیاں ونڄ سڳن۔ انھاں ہدایت کیتی جو قرضے ݙیوݨ دا عمل مزید سوکھا، شفاف تے عام کسان دی دسترس اچ بݨایا ونڄے تاں جو زرعی ترقی تے دیہاتی خوشحالی دے اہداف موثر انداز اچ حاصل کیتے ونج سڳن۔