وفاقی وزیر احسن اقبال دا انرجی چائنہ پاکستان دے ہیڈ کوارٹر دا دورہ، ایگزیبیشن ہال دا معائنہ تے سی پیک دے تحت توانائی دے شعبے اچ حاصل اہم سنگ میل دا جائزہ گھدا

اسلام آباد۔ 4 مارچ (اے پی پی) وفاقی وزیر برائے منصوبہ بندی، ترقی، اصلاحات تے خصوصی اقدامات پروفیسر احسن اقبال بدھ کوں انرجی چائنہ پاکستان دے ہیڈ کوارٹر اسلام آباد دا دورہ کیتا جتھاں انھاں دا تپاک نال استقبال کیتا ڳیا، فریقین سٹریٹجک شراکت داری دے عزم دا اعادہ کیتا۔ وفاقی وزیر ایگزیبیشن ہال دا معائنہ کیتا اتے سی پیک دے تحت توانائی دے شعبے اچ حاصل کیتے ڳئے اہم سنگ میل دا جائزہ گھدا۔ ایں موقع تے آپسی تعاون، جاری منصوبیاں تے پیش رفت تے مستقبل دی حکمتِ عملی بارے ڳالھ کیتی ڳئی۔بعد اچ سی ای ای سی قیادت تے پراجیکٹ ٹیماں دے نال اعلیٰ سطحی اجلاس تھیا جیندے اچ سکھی کناری ہائیڈرو پاور پراجیکٹ، داسو ہائیڈرو پاور پراجیکٹ، مہمند ڈیم تے نیلم جہلم ہائیڈرو پاور پراجیکٹ سودھے اہم منصوبیاں تے پیش رفت دا تفصیلی جائزہ گھدا ڳیا۔ انھاں منصوبیاں دے ذریعے پن بجلی دی ترقی کوں تیز کریندیں ہوئیں توانائی دے تحفظ تے سبز ترقی دے سانجھے عزم کوں سی پیک دے ݙوجھے مرحلے دے تحت ٻئی تقویت ݙتی ویندی پئی اے۔ اجلاس اچ ایں ڳالھ تے زور ݙتا ڳیا جو انھاں منصوبیاں دی بروقت تکمیل نال توانائی دے تحفظ کوں یقینی بݨاوݨ تے سبز و پائیدار ترقی دے اہداف دے حصول اچ مدد ملسی۔ پروفیسر احسن اقبال پالیسی دے تسلسل، سرمایہ کاری دے تحفظ تے شفاف عملدرآمد دے عزم دا اعادہ کریندیں ہوئیں آکھیا جو حکومت سی پیک دے ݙوجھے مرحلے دے تحت صنعتی تعاون، گرین انرجی تے علاقائی روابط دے فروغ تے خصوصی توجہ ݙیندی پئی اے جیندے نال سرمایہ کاراں دا اعتماد ٻیا مستحکم تھیسی۔ انھاں دا آکھݨ ہئی جو اے دورہ پاکستان تے چین وچال مضبوط تعلقات، پائیدار ترقی تے علاقائی خوشحالی آلے پاسے سانجھی پیش رفت دا عکاس اے۔