پاکستان دے 9 ملاحاں کوں انھاں دے جہاز توں بندر عباس منتقل کر ݙتے، ایران اچ پاکستانی سفیر

اسلام آباد۔ 4 مارچ (اے پی پی) ایران اچ پاکستان دے سفیر مدثر ٹیپو آکھیا جو گزریل رات پاکستان دے 9 ملاحاں کوں انھاں دے جہاز توں بندر عباس منتقل کر ݙتے، شدید چیلنجز دے باوجود اے انخلا ممکن تھیے ۔ بدھ کوں “ایکس” تے ہک پوسٹ اچ انھاں آکھیا جو انھاں کوں اے ݙسیندیں ہوئیں خوشی تھیندی پئی اے جو گزریل رات اساں آپݨے 9 ملاحاں کوں انھاں دے جہاز توں بندر عباس منتقل کرݨ اچ کامیاب تھیوں ۔ سفیر آکھیا جو انھاں اچوں 6 ملاحاں آپݨی مرضی نال جہاز تے رہݨ دا فیصلہ کیتا۔ پاکستانی سفیر آکھیا جو قونصلر خالد تاشفین اتے شاہد کشمیری انخلا اچ کلیدی کردار ادا کیتا۔ انھاں آکھیا جو اڄ انھاں بعض ملاحاں نال فون تے ڳالھ کر تے انھاں دی خیریت پچھی اے، انھاں کوں اج ای پاکستان روانہ کیتا ویندا پئے۔ پاکستانی سفیر انھاں سارے لوکاں بالخصوص قونصلر خالد تاشفین تے شاہد کشمیری دا تہہِ دل توں شکریہ ادا کیتا جنھاں انھاں دی پاکستان واپسی دے عمل اچ معاونت کیتی اتے جنھاں دی کوششاں نال مشکلاں دے باوجود اے انخلا ممکن تھئے۔