قومی اسمبلی اچ ایران تے امریکی و اسرائیلی جارحیت دے خلاف بحث مسلسل ݙوجھے ݙینھ وی جاری

اسلام آباد۔ 4 مارچ (اے پی پی) قومی اسمبلی اچ ایران تے امریکہ تے اسرائیلی جارحیت دے خلاف بحث ݙوجھے ݙینھ وی جاری رہی، مختلف جماعتاں دے ارکان ایران تے جارحیت دی مذمت کریندے علی خامنہ ای دی شہادت تے افسوس دا اظہار کیتا۔ ارکان جنگ دے خاتمے تے امن دے قیام کیتے پاکستان، ترکیہ تے ملائیشیا دے موثر کردار دی لوڑھ تے زور ݙتا۔پی پی پی دے مرزا اختیار بیگ آکھیا جو جݙاں پاکستان سعودی عرب دے نال دفاعی معاہدہ کیتا تاں اسرائیل پروپیگنڈا شروع کرݙتا جو پاکستان اسلامی ملکاں کوں ایٹمی شیلڈ ݙیندا پئے۔ انھاں آکھیا جو پاکستان، روس، چین، ترکیہ تے اقوامِ متحدہ دے سیکرٹری جنرل کوں جنگ دے خاتمے کیتے آپݨا کردار ادا کرݨا چاہیدے۔ اسامہ حمزہ آکھیا جو طاغوتی طاقتاں ایران تے حملہ آور ہن، شہید خامنہ ای اطاعت دی بجائے شہادت دا رستہ اپنائے۔ شیخ آفتاب آکھیا جو اسرائیل پہلے غزہ اچ فلسطینیاں دی نسل کشی شروع کیتی جیندے بعد امریکہ نال رل تے ایران تے ٻئے ملکاں دے خلاف وی کارروائیاں شروع کر ݙتیاں ۔ انھاں آکھیا جو ایران تے اسرائیلی حملہ قابلِ مذمت اے، اے ہک ٻیا کربلا اے۔ایم کیو ایم پاکستان دے ڈاکٹر فاروق ستار آکھیا جو وزیراعظم تے نائب وزیرِ خارجہ اڄ اِن کیمرہ اجلاس اچ قومی رہنماواں کوں صورتحال توں تفصیلی آگاہ کیتے۔ انھاں آکھیا جو اسرائیل توسیع پسندانہ کارروائی کریندے ایران تے حملہ کیتے، امام علی خامنہ ای دی شہادت ہک وݙا سانحہ اے۔ پی پی پی دی شاہدہ رحمانی آکھیا جو شہید امام علی خامنہ ای دی شہادت واقعہ کربلا دی یاد تازہ کرݙتی اے۔ اقبال آفریدی آکھیا جو واقعہ کربلا اساکوں ظالم دے خلاف کھڑے تھیوݨ دا درس ݙیندے، ایران تے حملہ اساکوں ایران دے نال ڈٹ تے کھڑے تھیوݨ دا درس ݙیندا پئے۔ شبیر بجارانی آکھیا جو ایران تے مشرقِ وسطیٰ سڑدا پئے تے باقی اسلامی ملک تماشہ ݙیہدے پئن۔ نعیمہ کشور آکھیا جو اڄوکی جنگ دے اثرات پورے خطے دے اسلامی ملکاں تے پوسن، پاکستان کوں امن دے قیام اچ آپݨا کردار ادا کرݨا پوسی۔