پی ٹی آئی تے اپوزیشن دیاں کجھ جماعتاں قومی بریفنگ اچ شرکت نہ کرتے ہک وار ول ثابت کر ݙتے جو انھاں سانڳے قومی مفاد توں زیادہ اہم آپݨی سیاست تے ذاتی ایجنڈا اے، ڈاکٹر طارق فضل چوہدری

اسلام آباد۔ 4 مارچ (اے پی پی) وفاقی وزیرِ پارلیمانی امور ڈاکٹر طارق فضل چوہدری آکھیے جو قومی سلامتی تے خطے دی موجودہ سنگین صورتحال پاروں وزیراعظم ہاؤس اچ ہک نہایت اہم سکیورٹی بریفنگ منعقد تھئی جیندے اچ ملک دے دفاعی و سکیورٹی اداریں سیاسی قیادت کوں خطے دی بدلدی صورتحال، درپیش خطرات تے پاکستان دی حکمتِ عملی دا ݙسایا۔ اے ڳالھ انھاں سماجی رابطے دی ویب سائٹ “ایکس” تے آپݨے ہک بیان اچ ݙسائی۔انھاں آکھیا جو بدقسمتی نال پاکستان تحریکِ انصاف تے اپوزیشن دیاں کجھ جماعتاں ایں اہم قومی بریفنگ اچ شرکت نہ کرتے ہک وار ول اے ثابت کر ݙتے جو انھاں دے نزدیک قومی مفاد توں زیادہ اہم آپݨی سیاست تے ذاتی ایجنڈا اے۔ جݙاں ملک کوں اتحاد، سنجیدگی تے ذمہ واری دی لوڑھ اے تاں اپوزیشن دا ایں طرح دے اہم فورم توں غیر حاضر رہݨ انتہائی غیر ذمہ دارانہ تے افسوسناک طرزِ عمل اے۔ انھاں آکھیا جو قومی سلامتی دے معاملات تے سیاست کائنی بلکہ یکجہتی دی لوڑھ ہوندی اے۔ ایہوجیھے نازک ویلھے اچ پوری قوم کوں ہک تھیوݨا چاہیدا ہئی، مگر اپوزیشن آپݨی غیر سنجیدگی نال نہ صرف پارلیمانی روایت کوں ضیان پڄائے بلکہ عوام کوں وی مایوس کیتے۔ انھاں واضح کیتا جو پاکستان دی سلامتی تے استحکام تے کوئی سمجھوتہ کائنی تھی سڳدا۔ قوم چنڳی طرح ݙیہدی پئی اے جو کون ریاست دے نال کھڑے تے کون محض سیاست چمکاوݨ اچ مصروف اے۔