وزیراعلیٰ مریم نواز دی ہندو برادری کوں ہولی تہوار دی مبارخ

لاہور۔ 4 مارچ (اے پی پی) وزیراعلیٰ پنجاب مریم نواز پاکستان سودھے دنیا اچ موجود ہندو برادری کوں ہولی تہوار دی مبارخ ݙتی اے۔ ہندو برادری دے تہوار ہولی تے آپݨے خصوصی پیغام اچ وزیراعلیٰ آکھیا جو رنگاں دا تہوار ہولی بہار آوݨ دی علامت اے، ہولی امید دا پیغام اے تے او امید جیڑھی اساکوں ہک بہتر مستقبل دی خبر ݙیندی اے۔ انھاں آکھیا جو اقلیتی برادری کوں تعلیم، صحت، روزگار تے ٻیاں سہولتاں ہکو جیہاں ݙتیاں ویندیاں پئن، ایہو جیہا پنجاب بݨیندے پیوں جتھاں ہر شہری آپݨے آپ کوں محفوظ، بااختیار تے برابر دا پاکستانی محسوس کرے۔وزیراعلیٰ مریم نواز آکھیا جو پنجاب حکومت اقلیتاں دے مذہبی تے ثقافتی تہواراں کوں سرکاری سطح تے مناوݨ دا وی اہتمام کریندی پئی اے، پنجاب اچ وسݨ آلی ہندو برادری ساݙے معاشرے دا لازمی حصہ اے۔ وزیراعلیٰ آکھیا جو اقلیتی برادری دے مذہبی تہواراں کیتے گرانٹ دی رقم 15 ہزار روپے ہے، مینارٹی کارڈ دے ذریعے مستحق اقلیتی خانداناں کوں 10,500 روپے دی مالی امداد وی ݙتی ویندی پئی اے۔