صوبے اچ 23 لکھ توں ودھ نگہبان کارڈز لوکاں دی دہلیز تئیں پڄائے ڳئن ، عظمیٰ بخاری

اسلام آباد۔ 4 مارچ (اے پی پی) وزیرِ اطلاعات و ثقافت پنجاب عظمیٰ بخاری آکھیے جو پنجاب حکومت دے رمضان نگہبان پیکج دی ونڈ دا سلسلہ کامیابی نال جاری اے تے مستحق لوکاں کوں امدادی رقم بغیر کہیں لائن دے انھاں دی دہلیز تئیں پڄائی ویندی پئی اے۔ انھاں آکھیا جو حکومت شفافیت، رفتار تے عزتِ نفس کوں یقینی بݨیندے عوامی خدمت دا نواں معیار قائم کیتے۔ انھاں آکھیا جو ہݨ تئیں نگہبان رمضان دسترخوان تے افطاری کرݨ آلے لوکاں دی مجموعی تعداد 15 لکھ 78 ہزار 578 تھی چکی اے جیڑھا ایں پروگرام تے عوام دے اعتماد دا واضح ثبوت اے۔انھاں ݙسایا جو پنجاب دے اضلاع اچ مجموعی طور تے 26 لکھ 8 ہزار 192 نگہبان کارڈز وصول کیتے تے 23 لکھ 2 ہزار 540 نگہبان کارڈز لوکاں دی دہلیز تئیں پڄائے ڳئن ۔ مزید برآں ہݨ تئیں 19 لکھ 68 ہزار 829 نگہبان کارڈز کیش وی کروائے ڳئن۔ انھاں آکھیا جو عوامی شکایتاں تے رہنمائی کیتے شروع کیتی ڳئی ”مریم کوں ݙسو“ ایپ دے ذریعے ہݨ تئیں 13 ہزار 892 شہریاں کوں فی کس 10 ہزار روپے امداد ݙتی ڳئی اے جیڑھا حکومت دے وقتی تے موثر رسپانس دا مظہر اے۔