جݙاں تئیں افغانستان دی سرزمین توں پاکستان دے خلاف دہشت گردی تے دراندازی دے مکاوݨ گارنٹی نی ݙتی ویندی آپریشن ”غضب للحق“ جاری رہسی، ڈاکٹر طارق فضل چوہدری

اسلام آباد۔ 4 مارچ (اے پی پی) وفاقی وزیرِ پارلیمانی امور ڈاکٹر طارق فضل چوہدری واضح کیتے جو جݙاں تئیں افغانستان دی سرزمین توں پاکستان دے خلاف دہشت گردی تے دراندازی دے مکاوݨ دی گارنٹی کائنی ݙتی ویندی آپریشن ”غضب للحق“ جاری رہسی، 2022ء دے بعد افغان طالبان رجیم اچ ساݙھے 8 ہزار توں ودھ پاکستانی دہشت گردی دا نشانہ بݨئے، ترلائی اچ امام بارگاہ، بنوں تے باجوڑ اچ دہشت گرد حملیں دے تانے بانے افغانستان نال ملݨ تے ایں کوں بھرپور جواب ݙیوݨ دا فیصلہ کیتا ڳیا۔قومی اسمبلی اچ ڳالھ کریندے ڈاکٹر طارق فضل چوہدری آکھیا جو خطے دی موجودہ صورتحال تے ہر ہک کوں تشویش اے، اڄ وزیراعظم دی زیرِ صدارت پارلیمانی سربراہان دا اہم اجلاس منعقد تھیا جیندے اچ خطے دی موجودہ صورتحال تے تفصیلی بریفنگ ݙتی ڳئی۔ وفاقی وزیر آکھیا جو تاریخ گواہ اے جو پاکستان ہمیشہ خطے اچ امن و استحکام کیتے کوششاں کیتن، ہندوستان دے نال تعلقات چنڳے نہ تھیوݨ دے باوجود پاکستان کݙہیں جارحیت دی پالیسی اختیار کائنی کیتی، خودکش حملیں، بم دھماکیں تے دہشت گردی دے واقعات دے باوجود اساں ہمیشہ امن دی ڳالھ کیتی اے تاں جو جݙاں وی پاکستان تے کتھاؤں وی جارحیت تھئی تاں اوندا بھرپور جواب ݙتا ڳیا، 10 مئی کوں بھارتی جارحیت تے جیڑھا جواب اوں کوں ݙے ݙتا ڳیا او عالمی سطح تے ریکارڈ دا حصہ اے، اوندے اچ وی پہل بھارت دی طرفوں کیتی ڳئی جیندا اساں جواب ݙتا۔انھاں آکھیا جو افغانستان کیتے پاکستان بے پناہ قربانیاں ݙتن، روس، امریکہ دے افغانستان تے حملیں دے دوران پاکستان دی ہمدردیاں افغانستان دے نال رہیاں، اساں کئی ݙہاکیں لکھاں افغان مہاجرین دی مہمان نوازی کیتی جیڑھی تاریخ دا حصہ اے، انھاں ساریاں چنڳائیاں دے باوجود موجودہ صورتحال ساریں دے سامݨے ہے، 2022ء توں افغانستان اچ طالبان دی حکومت آوݨ دے بعد پاکستان اچ دہشت گردی دے واقعات اچ ساݙھے 8 ہزار توں ودھ شہادتاں تھیاں جنھاں اچ سیکورٹی فورسز تے سویلین شامل ہن، انھاں کارروائیاں توں طالبان حکومت کوں باضابطہ آگاہ کیتا ویندا رہیے، افغانستان اچ دہشت گرداں دے محفوظ ٹھکاݨیں دے ثبوت انھاں کوں ݙتے ویندے رہیے تاں جو طالبان حکومت انھاں کوں روکݨ کیتے کوئی عملی اقدامات کائنی چاتے، قطر تے استنبول اچ طالبان دے نال مذاکرات تھئے، اساں دہشت گردی کیتے سرزمین دے استعمال کوں روکیے ونجݨ تے سارے ممکنہ وسائل ݙیوݨ دی وی پیشکش کیتی تاں جو ایندے باوجود ساکوں اے یقین کائںی ݙیوایا ڳیا جو اوندی سرزمین پاکستان دے خلاف استعمال کائناں تھیسی۔وفاقی وزیر آکھیا جو پاکستان اچ دہشت گردی اچ بھارت دا ہتھ اے، اساں طالبان کوں اوندے ثبوت ݙتے، اڄوکے ترلائی خودکش حملے دے تانے بانے افغانستان نال ملدن، باجوڑ تے بنوں اچ دہشت گردی دے واقعات اچ افغان شہری ملوث ہن، ایں ساری صورتحال دے بعد افغانستان کوں اے پیغام ݙیوݨ دا فیصلہ کیتا ڳیا جے اتھاں پاکستان اچ دہشت گردی تے شہادتاں تھیسن تاں اوں ضیان دا خمیازہ افغانستان کوں وی بھوگݨا پوسی، اتھاں موجود دہشت گرداں دے ٹھکاݨیں تے محفوظ پناہ گاہواں تے آپریشن کیتا ویندا پئے جیندے خاطر خواہ نتیجے سامݨے آندے پئن، اے آپریشن آپݨے اہداف دے حصول تئیں جاری رہسی، اساں افغانستان توں دراندازی کوں ہمیشہ کیتے روکݨا اے۔ انھاں آکھیا جو پاکستان دے نائب وزیراعظم تے وزیرِ خارجہ افغانستان دے ترائے دورے کیتے، وزیرِ دفاع افغانستان دا دورہ کر تے افغان طالبان کوں اے باور کرایا جو افغانستان توں دہشت گردی کیتے دراندازی روکی ونڄے تان جو اوندا کوئی مثبت نتیجہ کائنی نکلیا، جݙاں تئیں افغانستان اے یقیین نی ݙویندا جو اوندی سرزمین پاکستان تے حملیں تے دراندازی کیتے استعمال کائناں تھیسی، آپریشن جاری رہسی۔