وزیراعلیٰ مریم نواز شریف دی صدارت اجلاس، پنجاب اچ ترائے مہینے دے اندر فلڈ زون خالی کراوݨ دی منظوری

لاہور۔ 6 مارچ (اے پی پی) وزیراعلیٰ مریم نواز شریف پنجاب اچ ترائے مہینے دے اندر فلڈ زون خالی کراوݨ دی منظوری ݙے ݙتی۔ ایں حوالے نال وزیراعلیٰ دی صدارت پوسٹ فلڈ انتظامات کیتے خصوصی اجلاس تھیا جیندے اچ متعلقہ محکمیاں تفصیلی بریفنگ ݙتی۔ وزیراعلیٰ مریم نواز شریف دریا دی گزرگاہواں اچ تعمیرات بݨاوݨ دی پابندی تے عملدرآمد یقینی بݨاوݨ دا حکم ݙتا۔ اجلاس اچ آبی گزرگاہواں اچ قائم غیر قانونی تعمیرات سیلاب نال ڈھݨ دی صورت اچ امداد نہ ݙیوݨ دا فیصلہ کیتا ڳیا۔ وزیراعلیٰ آبی گزرگاہواں اچ غیر قانونی تعمیرات دے سدِباب کیتے مستقل مانیٹرنگ دی ہدایت کیتی۔ بریفنگ اچ ݙسایا ڳیا جو فلڈ زون اچ تعمیرات بݨاوݨ تے پابندی کیتے سپریم کورٹ وی فیصلہ ݙے چکی اے۔ وزیراعلیٰ فیزیبلٹی رپورٹ مکمل تھیوݨ تے چنیوٹ اچ بند بݨاوݨ دی اصولی منظوری تے اِن فلیٹ ایبل ڈیم ٹیکنالوجی متعارف کراوݨ دی ہدایت کیتی۔ اجلاس اچ پنجاب اچ 17 ڄہیں تے منی ڈیم بݨاوݨ دی تجویز تے اتفاق جݙاں جو کالا باغ تے سدھنائی دے ڄاہ تے آبی ذخائر دی استعداد ودھاوݨ دا وی فیصلہ کیتا ڳیا۔ اجلاس اچ پی ڈی ایم اے دی ری سٹرکچرنگ تے 8 نویں ونگ بݨاوݨ دا فیصلہ کیتا ڳیا۔ وزیراعلیٰ مریم نواز ڈسٹرکٹ ایمرجنسی آپریشن سینٹر، ریجنل ڈیزاسٹر تے ویئر ہاؤس قائم کرݨ دی منظوری وی ݙے ݙتی۔ اجلاس کوں ݙسایا گیا جو وزیراعلیٰ دی ہدایت تے سیلاب توں متاثرہ رابطہ سڑکاں تے رستیاں دی بحالی مکمل تھی ڳئی اے۔ پنجاب اچ سیلاب توں متاثرہ 563 کلومیٹر طویل 186 روڈز، 446 پلیاں تے ہک پل بحال کر ݙتا ڳیا۔ وزیراعلیٰ ریسکیو 1122 کوں فلڈ آپریشن کیتے جدید ترین آلات مہیا کرݨ دی منظوری ݙے ݙتی۔ اجلاس اچ 10 لینڈنگ کرافٹ/ بیڑے، بوٹ کیئریر ٹرک، نیویگیشن تے کمیونیکیشن دے جدید آلات، فلائنگ لائف بوائے جیکٹ تے ٻئے آلات ڳھنݨ دا فیصلہ کیتا ڳیا۔ بریفنگ اچ ݙسایا گیا جو 5 دریاواں تے فلڈ دے حوالے نال 1990 ہائی رسک زون، 1278 میڈیم رسک زون، 3169 لو رسک زون ہن۔ پنجاب اچ آبپاشی دے 183 پراجیکٹ جاری، 298 ڈرین/ سیلابی نالے تے 67 ڈرینج سسٹم دی ڈی سیلٹنگ کیتی ویسی، ایں سال وی 28 فیصد تئیں ودھ بارشاں دی پشین گوئی کیتی ویندی پئی اے۔ وزیراعلیٰ مریم نواز کوں اجلاس اچ شارٹ، میڈیم تے لانگ ٹرم پلاننگ تے تفصیلی رپورٹ وی پیش کیتی ڳئی۔