وزیراعظم محمد شہباز شریف دی صوبائی حکومتاں کوں پٹرولیم مصنوعات دے ذخیرہ اندوزاں دے خلاف سخت قانونی کارروائی دی ہدایت

اسلام آباد۔ 6 مارچ (اے پی پی) وزیراعظم محمد شہباز شریف صوبائی حکومتاں کوں پٹرولیم مصنوعات دے ذخیرہ اندوزاں دے خلاف سخت قانونی کارروائی دی ہدایت کریندیں ہوئے آکھیا جو جیہڑا پٹرول پمپ مصنوعی قلت دے مکروہ دھندے اچ ملوث ہووے، اونکوں فوری بند تے اوندا لائسنس منسوخ کر تے قانونی کارروائی کیتی ونڄے۔ وزیراعظم محمد شہباز شریف دی صدارت پیٹرولیم مصنوعات بارے اعلیٰ سطح اجلاس جمعہ کوں تھیا۔ وزیرِ اعظم آفس دے میڈیا ونگ توں جاری بیان دے مطابق اجلاس اچ نائب وزیراعظم تے وزیرِ خارجہ محمد اسحاق ڈار، وفاقی وزراء جام کمال خان، احد خان چیمہ، محمد اورنگزیب، عطا اللہ تارڑ، علی پرویز ملک، اویس خان لغاری، وزیرِ مملکت بلال اظہر کیانی، معاونِ خصوصی ہارون اختر، گورنر اسٹیٹ بینک جمیل احمد، چاریں صوبیاں، آزاد کشمیر تے گلگت بلتستان دے چیف سیکرٹریز، تے اعلیٰ سرکاری حکام شریک تھئے۔ وزارتِ پٹرولیم اجلاس کوں خطے دی بدلدی ہوئی صورتحال دے تناظر اچ پٹرولیم مصنوعات دے ذخائر بارے تفصیلی بریفنگ ݙتی، جیندے اچ ݙسایا ڳیا جو ملکی ضروریات کوں پورا کرݨ کیتے ملک اچ پیٹرولیم مصنوعات دا مناسب ذخیرہ موجود اے۔ وزیراعظم صوبائی حکومتاں کوں ہدایت کیتی جو پٹرولیم مصنوعات دے ذخیرہ اندوزاں دے خلاف سخت قانونی کارروائی کیتی ونجے۔ جیہڑا پٹرول پمپ مصنوعی قلت دے ایں مکروہ دھندے اچ ملوث ہووے، اونکوں فوری بند کیتا ونجے تے اوندا لائسنس منسوخ کر تے قانونی کارروائی کیتی ونجے۔ وزیراعظم وزیرِ پیٹرولیم کوں ہدایت کیتی جو او صوبیاں دا دورہ کرن اتے صوبائی حکومتاں دے نال رَل تے پیٹرولیم مصنوعات دی بچت تے انھاں دی عوام کوں بلاتعطل فراہمی دے حوالے نال لائحہ عمل تے منصوبہ بندی تیار کرن۔ وزیراعظم پیٹرولیم مصنوعات دی نقل و حرکت بارے ڈیش بورڈ بݨاوݨ دی وی ہدایت ݙتی جیندے ذریعے صوبیاں دے نال رئیل ٹائم اچ ڈیٹا شیئر تھیوے اتے پٹرولیم مصنوعات دی نقل و حمل دی نگرانی کیتی ونجے۔