ای سی سی بجلی دے شعبے اچ جامع اصلاحات دے پیکج دی منظوری ݙے ݙتی، کئی وزارتاں تے ڈویژنز کیتے تکنیکی ضمنی گرانٹس دی وی منظوری

اسلام آباد۔ 6 مارچ (اے پی پی) کابینہ دی اقتصادی رابطہ کمیٹی (ای سی سی) وزارتِ توانائی دی طرفوں بجلی دی پیداواری لاڳت اچ کمی، ادائیگیاں متعلق ذمہ واریاں نال نبڑݨ تے گردشی قرض پاروں پیدا تھیوݨ آلے دٻاؤ کوں گھٹ کرݨ کیتے جامع اصلاحاتی پیکج دی منظوری ݙے ݙتی اے، ای سی سی کئی وزارتاں تے ڈویژنز کیتے تکنیکی ضمنی گرانٹس دی وی منظوری ݙتی۔اقتصادی رابطہ کمیٹی دا اجلاس وفاقی وزیرِ خزانہ و محصولات سینیٹر محمد اورنگزیب دی زیرِ صدارت منعقد تھیا۔ اجلاس اچ پٹرولیم ڈویژن دی طرفوں انٹرنیشنل انرجی فورم کیتے پاکستان دی سالانہ شراکت دی ادائیگی کیتے 13.1 ملین روپے دی تکنیکی ضمنی گرانٹ متعلق سمری دی منظوری ݙتی ڳئی۔ کمیٹی کوں ݙسایا ڳیا انٹرنیشنل انرجی فورم دی رکنیت برقرار رکھݨ عالمی توانائی دے عالمی مکالمے تے تعاون اچ پاکستان دی شرکت کیتے بدستور اہم اے۔اجلاس اچ پٹرولیم ڈویژن دی طرفوں گیس پیدا کرݨ آلے فیلڈز دے پنج کلومیٹر دے دائرے اچ واقع دیہات اچ گیس ݙیوݨ دیاں اسکیماں کیتے 3 ارب روپے دی تکنیکی ضمنی گرانٹ دی منظوری ݙے ݙتی ڳئی۔ اے اسکیماں سوئی سدرن تے سوئی نادرن دے ذریعے مکمل کیتیاں ویسن۔ ای سی سی وزارتِ وفاقی تعلیم و پیشہ ورانہ تربیت دی طرفوں بیسک ایجوکیشن کمیونٹی سکولز دے اساتذہ کوں بقایا واجبات دی ادائیگی اچ سہولت ݙیوݨ کیتے جاری مالی سال دے دوران 200 ملین روپے دی تکنیکی ضمنی گرانٹ ݙیوݨ دی وی منظوری ݙے ݙتی۔ اے مالی ذمہ داری عدالت دی ہدایات دی روشنی اچ اے جنھاں دے تحت اگست 2017 توں جون 2021 دے عرصے کیتے نوٹیفائیڈ گھٹ توں گھٹ اجرت دے موجب تنخواہواں دے فرق دی ادائیگی کرݨی اے۔اجلاس اچ وزارتِ وفاقی تعلیم و پیشہ ورانہ تربیت دی طرفوں پیش کیتی ڳئی ہک ٻئی سمری دا وی جائزہ ڳھدا گیا جیندے اچ ری اسٹرکچرڈ ہائر ایجوکیشن ڈیولپمنٹ ان پاکستان منصوبے دے تحت ہائر ایجوکیشن کمیشن کیتے مختص اضافی 4 ملین ڈالر تے ری لینڈنگ دی شرائط توں استثنیٰ طلب کیتا ڳیا ہئی۔ ای سی سی کوں ݙسایا گیا جو عالمی بینک انھاں فنڈز کوں انویسٹمنٹ پراجیکٹ فنانسنگ/ ٹیکنیکل اسسٹنس جزو دے طرف منتقل کیتے، جیندے نتیجے اچ ہائر ایجوکیشن کمیشن دا حصہ پہلے توں مستثنیٰ قرار ݙتا ڳئے 77 ملین امریکی ڈالر توں ودھ ڳئے۔اجلاس اچ این ڈی ایم اے دی طرفوں ساوݨ رسپانس 2025 آپریشنز تے ٻاہرلے ملک انسانی ہمدردی دی امداد دے دوران کیتے ڳئے خرچے دی واپسی کیتے 3.63 ارب روپے دی تکنیکی ضمنی گرانٹ متعلق سمری دی منظوری ݙتی ڳئی۔ اجلاس اچ پاور ڈویژن دی طرفوں جاری مالی سال دے دوران سسٹین ایبل ڈیولپمنٹ گولز اچیومنٹ پروگرام دی اسکیماں دے نفاذ کیتے 1.3 ارب روپے دی تکنیکی ضمنی گرانٹ دی منظوری وی ݙتی ڳئی۔اجلاس اچ وزارتِ توانائی (پاور ڈویژن) دی طرفوں بجلی دی پیداواری لاڳت اچ کمی، ماضی دی ادائیگیاں متعلق ذمہ واریاں نال نبڑݨ تے پاور سیکٹر اچ گردشی قرض پاروں پیدا تھیوݨ آلے دٻاؤ کوں گھٹ کرݨ کیتے جامع اصلاحاتی پیکج دی تجویز دا جائزہ ڳھدا ڳیا۔ کمیٹی کوں ݙسایا ڳٰا مجوزہ اقدامات ٻہوں پاور پروڈیوسرز دے نال مذاکرات دا نتیجہ ہن تے انھاں دا مقصد ٹیرف دے ڈھانچے کوں معقول بݨاوݨ، ادائیگیاں دے انتظامات کوں مؤثر بݨاوݨ تے سانجھے طور تے طے شدہ تصفیں دے ذریعے بقایا مالی ذمہ واریاں کوں حل کرݨ اے۔ ای سی سی اصلاحاتی پیکج تے ایندے متعلق مالی اقدامات دی منظوری ݙے ݙتی تے آکھیا جو ایں اقدام نال پاور سیکٹر دی پائیداری اچ بہتری، صارفین تے ٹیرف دے دٻاؤ اچ کمی تے شعبے اچ وسیع تر اصلاحات دی حمایت متوقع اے۔اجلاس اچ وزارتِ اطلاعات و نشریات دی طرفوں عوامی معلومات و آگاہی مہمات متعلق بقایا واجبات دی ادائیگی کیتے 2.231 ارب روپے دی تکنیکی ضمنی گرانٹ متعلق سمری تے کمیٹی 1.47 ارب روپے تئیں دی گرانٹ دی منظوری ݙتی تے وزارت کوں باقی گرانٹ ضرورت اڳلی سہ ماہی اچ پیش کرݨ دی ہدایت کیتی۔ اجلاس اچ وفاقی وزیرِپیٹرولیم علی پرویز ملک، وزیرِ تجارت جام کمال خان، وفاقی وزیر منصوبہ بندی، ترقی و خصوصی اقدامات احسن اقبال چوہدری، وفاقی وزیرِ سرمایہ کاری قیصر احمد شیخ (ورچوئل شرکت)، وزیرِ اعظم دے معاونِ خصوصی صنعت و پیداوار ہارون اختر خان، متعلقہ وزارتاں، ڈویژنز تے ریگولیٹری اداریں دے وفاقی سیکریٹریز تے سینئر حکام شرکت کیتی۔