ملکی دفاع مضبوط ہتھ اچ اے، جنگاں تنازعات دا حل کائنی، پاکستان قیامِ امن کیتے اقوامِ عالم اچ آپݨا کلیدی کردار ادا کریندا پئے، عطاء اللہ تارڑ دا سابق صدر محمد رفیق تارڑ مرحوم دی برسی تے تقریب توں خطاب

لاہور۔ 7 مارچ (اے پی پی) وفاقی وزیرِ اطلاعات تے نشریات عطاء اللہ تارڑ آکھیا جو ملکی دفاع مضبوط ہتھ اچ اے، جنگاں تنازعات دا حل کائنی، اقوامِ عالم اچ قیامِ امن کیتے پاکستان سفارتی محاذ تے آپݨا کلیدی کردار ادا کریندا پئے، عالمی سطح تے تیل دی قیمتاں اچ اضافہ تھیا، وزیرِ اعظم محمد شہباز شریف ایرانی سپریم لیڈر آیت اللہ خامنہ ای دی شہادت تے افسوس دا اظہار کیتا، رفیق تارڑ مرحوم دی زندگی نظریہ پاکستان تے عقیدہ ختمِ نبوت تے گزری۔ اے ڳالھیں انہاں ہفتہ کوں اتھاں سابق صدرِ پاکستان و تحریکِ پاکستان دے مخلص کارکن تے ادارہ نظریہ پاکستان دے سابق چیئرمین محمد رفیق تارڑ مرحوم دی چوتھی برسی دے موقع تے ادارہ نظریہ پاکستان ولوں ایوانِ کارکنانِ تحریکِ پاکستان اچ تھیوݨ آلی تقریب اچ شرکت دے موقع تے خطاب کریندیں ہوئیں کیتا۔ وفاقی وزیر آکھیا جو پاکستان ہک آزاد ریاست اے جینکوں اساݙے آباؤ اجداد لکھاں قربانیاں دے بعد حاصل کیتا، دنیا اچ ݙو ای ریاستاں ہن جیہڑی کلمہ طیبہ دی بنیاد تے قائم تھیاں، انھاں اچ ہک ریاستِ مدینہ تے ݙوجھی مملکتِ خداداد پاکستان اے، ایں ملک دے قیام دے پچھوں ہک نظریہ ہئی جیندے پاروں اڄ اساں ہک آزاد ریاست اچ ساہ گھندے پئیوں، انشا اللہ پاکستان تا قیامت قائم تے دائم رہسی۔اڄوکے عالمی حالات دے حوالے نال ڳالھ مہاڑ کریندیں ہوئیں وفاقی وزیر آکھیا جو ملک دا دفاع مضبوط ہتھاں اچ اے اتے معرکہ حق اچ دنیا اساݙی طاقت دا اندازہ کر چکی اے جو کینویں اساݙی فوج آپݨے توں وݙے دشمن کوں ناکوں چنے چبوائے، دشمن ہݨ میلی اکھ نال ݙیکھݨ دی جرات نئی کر سڳدا۔ انھاں آکھیا جو پاکستان امن پسند ملک اے، جنگاں آپسی تنازعات دا حل کائنی ہوندیاں، وزیرِ اعظم محمد شہباز شریف تے فیلڈ مارشل سید عاصم منیر دی قیادت اچ امن دے قیام کیتے سفارتی محاذ تے کوششاں کوں پوری دنیا منیندی اے۔ انھاں آکھیا جو سابق صدرِ مملکت محمد رفیق تارڑ نظریہ پاکستان دے فروغ تے قومی اقدار دے تحفظ کیتے سرگرم کردار ادا کریندے رہیے، ایں حوالے نال انھاں دی خدمات کوں ہمیشہ یاد رکھا ویسی۔