اساݙی ماواں، دِھیریں، بھینڑیں تے بیویاں ملک دی ترقی اچ اہم کردار ادا کریندیاں پئن، تریمتیں دی قوت، حوصلے، قیادت تے گراں قدر خدمات کوں سراہیندے ہیسے، وزیراعظم شہباز شریف

اسلام آباد۔ 8 مارچ (اے پی پی) وزیراعظم محمد شہباز شریف عالمی یومِ تریمت دے موقع تے پاکستان دی تریمتیں کوں خراجِ تحسین پیش کریندیں ہوئیں آکھیا اساݙی ماواں، دِھیریں، بھینڑیں تے بیویاں ملک دی ترقی اچ اہم کردار ادا کریندیاں پئن، تریمتیں دی قوت، حوصلے، قیادت تے گراں قدر خدمات کوں سراہیندے ہیسے جیہڑیاں او آپݨے خاندان، معاشرے تے ملک کیتے انجام ݙیندی پئن۔ اتوار کوں سماجی رابطے دی ویب سائٹ “ایکس” تے آپݨے سنیھے اچ وزیرِ اعظم آکھیا جو تعلیم، صحت، عوامی خدمات، کاروبار، سائنس، فنون تے کھیݙ سودھے ہر شعبے اچ پاکستانی تریمتیں دی محنت تے عزم ملک دی ترقی کیتے باعثِ فخر اے۔ انھاں دی کامیابیاں پوری قوم کیتے تحریک دا باعث ہن تے مضبوط تے خوشحال پاکستان دے قیام دے عزم کوں ٻیا مستحکم کریندن۔ وزیرِ اعظم آکھیا جو تریمتیں کوں بااختیار بݨاوݨ حکومت دے وژن دا مرکزی حصہ اے، حکومت تریمتیں کیتے موقعیاں اچ اضافہ، تعلیم تے معاشی سرگرمیاں اچ مساوی رسائی تے ایجھا سازگار ماحول فراہم کرݨ کیتے پرعزم اے جتھ ہر تریمت آپݨی مکمل صلاحیتاں دے نال ملک دے مستقبل دی تعمیر اچ مؤثر کردار ادا کر سڳے۔