فائیو جی سپیکٹرم دی نیلامی کل تھیسی، ملک دے ترائے وݙے ٹیلی کام آپریٹر حصہ گھنسن

اسلام آباد۔ 9 مارچ (اے پی پی) فائیو جی سپیکٹرم دی نیلامی (کل) منگل کوں تھیسی، نیلامی اچ ملک دے ترائے وݙے ٹیلی کام آپریٹر حصہ گھنسن۔ پی ٹی اے حکام ”اے پی پی“ کوں ݙسایا جو فائیو جی سپیکٹرم دی نیلامی دا عمل منگل کوں سویل 10 وڄے شروع تھیسی جیہڑا مختلف مراحل اچ شام تئیں جاری رہسی۔ ایں نیلامی اچ 6 بینڈز شامل ہن جنھاں اچوں 4 نویں ہن۔ حکام اے وی ݙسایا جو ٹیلی کام آپریٹر جاز، زونگ تے یو فون فائیو جی سپیکٹرم دی نیلامی اچ حصہ گھنسن۔ نیلامی دا عمل آن لائن طریقے نال مکمل کیتا ویسی۔ نیلامی دے عمل اچ شفافیت کوں یقینی بݨاوݨ کیتے پی ٹی اے جدید تے خصوصی سسٹم قائم کیتے۔ ایں ہارڈ ویئر سسٹم دے ذریعے بولی دے نتائج دا اعلان کیتا ویسی۔ وزیراعظم محمد شہباز شریف دی ہدایت تے وفاقی وزیر برائے انفارمیشن ٹیکنالوجی تے ٹیلی کمیونیکیشن شزہ فاطمہ خواجہ دی قیادت اچ بولی اچ شفافیت تے میرٹ کوں یقینی بݨایا ویسی۔ اے وی ݙسایا گیا جو ایں نیلامی دے بعد ٹیلی کام آپریٹرز چار مہینے اچ فور جی اچ موثر بہتری تے فائیو جی دی فراہمی یقینی بݨیسن، پہلے مرحلے اچ وفاقی دارالحکومت اتے چاریں صوبائی دارالحکومتاں اچ فائیو جی فراہم کیتی ویسی۔