پاکستان درست انٹیلی جنس معلومات دی بنیاد تے افغانستان دے اندر عسکریت پسنداں دے ٹکاݨیاں دے خلاف کارروائیاں کریندا پئے، وفاقی وزیر اطلاعات عطاء اللہ تارڑ دی غیر ملکی جریدیاں نال ڳالھ مہاڑ

اسلام آباد۔ 9 مارچ (اے پی پی) وفاقی وزیر اطلاعات تے نشریات عطاء اللہ تارڑ آکھیا جو پاکستان، افغانستان دے اندر عسکریت پسنداں دے ٹکاݨیاں دے خلاف درست انٹیلی جنس معلومات دی بنیاد تے کارروائیاں کریندا پئے، پاکستان افغانستان اچ کہیں شہری علاقے کوں نشانہ کائنی بݨایا، پاکستان صرف تے صرف دہشت گرداں دے بنیادی ڈھانچے تے انھاں دے معاون نظام کوں ہدف بݨیندا پئے۔ غیر ملکی جریدیاں نال ڳالھ مہاڑ کریندیں ہوئیں وفاقی وزیر اطلاعات آکھیا جو افغان طالبان رجیم ولوں پیش کیتے ڳئے خیالی اعداد و شمار کہیں سنجیدہ تبصرے دے وی قابل کائنی، افغان وزارتِ دفاع دے ترجمان توں پاکستان دے خلاف میدانِ جنگ اچ کامیابیاں دے دعوے درست کائنی تے محض پروپیگنڈا ہن۔ وفاقی وزیر اطلاعات عطاء اللہ تارڑ افغان طالبان رجیم تے اقوامِ متحدہ دے مشن برائے افغانستان ولوں افغان شہریاں دی ہلاکتاں دی خبر دی تردید کریندیں ہوئیں آکھیا جو کابل اچ قائم اقوامِ متحدہ دی ایجنسی دی انھاں معلومات دا مکمل انحصار طالبان حکومت تے اے۔ انھاں آکھیا جو افغان طالبان تے فتنہ الخوارج دے دہشت گرداں ولوں رل تے حملے کرݨ ایں ڳالھ دی تصدیق اے جو افغان طالبان حکومت تے افغانستان دی سرزمین توں سرگرم متعدد دہشت گرد تنظیماں وچال گٹھ جوڑ موجود اے۔ انھاں آکھیا جو افغان طالبان رجیم دے سارے حملیاں دا فوری تے موثر انداز اچ جواب ݙتا ڳیا۔ عطاء اللہ تارڑ آکھیا جو پاکستان دہشت گرداں تے انھاں دے معاونین بشمول افغان طالبان دے فوجی اݙیاں کوں درست طریقے نال نشانہ بݨایا۔