حکومت چیمبرز آف کامرس دے نمائندیں نال نیڑے رابطہ رکھݨ کیتے پرعزم اے، وزیرِ خزانہ محمد اورنگزیب دی آر سی سی آئی وفد نال ملاقات

اسلام آباد۔ 9 مارچ (اے پی پی) وفاقی وزیرِخزانہ محمد اورنگزیب راولپنڈی چیمبر آف کامرس (آر سی سی آئی) دے وفد نال ملاقات اچ آکھیے جو حکومت دی پہلی ترجیح ملک اچ ایندھن تے توانائی دی بلا تعطل فراہمی یقینی بݨاوݨ اے۔ انھاں آکھیا جو پٹرول، ڈیزل، ایل این جی تے ایل پی جی دی دستیابی تے کڑی نظر رکھی ہوئی اے تاں جوعالمی حالات پاروں پیدا تھیوݨ آلے کہیں وی دٻاؤ نال نبڑیا ونڄ سڳے۔ملاقات اچ وزیرِ خزانہ آر سی سی آئی دے وفد دی طرفوں امریکہ دے اڄوکے دورے تے اتھاں معاشی اداریں نال رابطیں دی تعریف کیتی ۔ انھاں آکھیا جو حکومت معیشت دی بہتری کیتے اوکھے لیکن ضروری اقدامات کیتن جیندے نال سرمایہ کاراں دا اعتماد بحال تھئے تے معاشی اشاریے مستحکم تھئن۔ انھاں مزید آکھیا جو ٹیکس نیٹ کوں ودھاوݨ تے ڈیجیٹل نظام دے ذریعے شفافیت گھن آوݨ تے کم جاری اے تے کاروباری برادری دے جائز خدشات کوں دور کیتا ویسی۔ایندے توں پہلے آر سی سی آئی دے صدر عثمان شوکت وزیرِ خزانہ کوں دورہِ امریکہ دے حوالے نال بریفنگ ݙتی تے ݙسایا جو امریکی کاروباری حلقے آئی ٹی، صحت، معدنیات تے آٹوموبائل دے شعبیں اچ پاکستان نال تعاون اچ دلچسپی رکھیندن۔ وفد معاشی اصلاحات تے توانائی دی صورتحال تے وزیرِ خزانہ دی بریفنگ دی تعریف کیتی تے امید ظاہر کیتی جو ایجھے رابطیاں نال پاکستان دی معاشی ترقی ممکن تھیسی۔