مریم نواز دا خطے اچ جنگ دے نتیجے اچ غیر معمولی معاشی اوکھ دے مقابلے کیتے غیر معمولی اقدامات دا فیصلہ

لاہور۔ 9 مارچ (اے پی پی) وزیراعلیٰ پنجاب مریم نواز خطے اچ جنگ دے نتیجے اچ غیر معمولی معاشی اوکھ دے مقابلے کیتے غیر معمولی اقدامات دا فیصلہ کیتے۔ وزیراعلیٰ مریم نواز شریف اعلان کیتے جو پٹرولیم بحران دے خاتمے تئیں صوبائی وزراء کیتے سرکاری فیول بند کیتا ویسی۔ سرکاری افسران دی گاݙیاں کیتے پٹرول تے ڈیزل الاؤنس اچ 50 فیصد فوری کمی کر ݙتی ڳئی اے۔صوبائی وزراء تے اعلیٰ سرکاری افسراں دے رلے چلݨ آلی پروٹوکول گاݙیاں تے وی پابندی لا ݙتی ڳئی اے۔ ناگزیر سکیورٹی کیتے صرف ہک گاݙی صوبائی وزراء تے اعلیٰ سرکاری افسراں دے رلے تھیسی۔ فیصلہ کیتا ڳئے جو سرکاری دفتراں اچ “ورک فرام ہوم” دا فیصلہ تھئے، صرف ضروری عملہ ہی دفتر آسی۔ سکول، کالج تے یونیورسٹیاں 10 مارچ توں 31 مارچ تئیں بند رہسن، تاں جو امتحانات شیڈول موجب تھیسن۔ سکول تے تعلیمی ادارے آن لائن کلاسز گھن سڳسن۔شہریاں دی سہولت کیتے ای بزنس تے “مریم دی دستک” دے تحت سروسز جاری رہسن۔ سرکاری امور دی انجام دہی کیتے آن لائن اجلاس تے ٹیلی کانفرنسز منعقد تھیسن۔ سرکاری آؤٹ ڈور تقریبات تے پابندی لا ݙتی ڳئی اے تے ہارس اینڈ کیٹل شو دا ثقافتی تہوار وی ملتوی کر ݙتا ڳیا۔ پٹرولیم مصنوعات دی مانیٹرنگ کیتے ہر ضلع اچ ڈسٹرکٹ پٹرولیم مانیٹرنگ کمیٹیاں قائم کرݨ دا حکم ݙتے۔ پی آئی ٹی بی کوں پٹرولیم مصنوعات کیتے ٹریک اینڈ ٹریس سسٹم تیار کرݨ دا ٹاسک ݙے ݙتا ڳیا۔مریم نواز مزید آکھیا جو ورک فرام ہوم دے تحت صرف اضافی سپورٹ سٹاف دی آمد و رفت بند کیتی ویندی پئی اے، دفتراں اچ کم بند کائنی تھیوݨا۔ نجی سیکٹر کوں وی ورک فرام ہوم تے غیر ضروری تقریبات نہ کرݨ دی ایڈوائزری جاری کیتی ویندی پئی اے۔ وزیراعلیٰ اپیل کیتی جو بحرانی صورتحال دے پیشِ نظر عوام آؤٹ ڈور فنکشن نہ کرن تے ہنگامی حالات اچ لیٹ نائٹ شاپنگ توں پرہیز کرن۔ انھاں آکھیا جو وزیراعظم شہباز شریف تے فیلڈ مارشل عاصم منیر کوں اوکھےترین بحران اچ جرات مندانہ فیصلیں تے خراجِ تحسین پیش کریندوں۔ بہادر قوماں اوکھے حالات دا اتحاد، صبر تے دانشمندی نال مقابلہ کریندن۔