فائیوجی خدمات دے اجراء نال مصنوعی ذہانت، بلاک چین تے ویب 3.0 سویں ٹیکنالوجیز کوں فروغ ملسی، پاکستان جدید ڈیجیٹل معیشت آلے پاسے ونڄ سڳسی، وفاقی وزیرِ خزانہ دا سپیکٹرم نیلامی دی تقریب توں خطاب

اسلام آباد۔ 10 مارچ (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیا جو ڈیجیٹل ترقی وسیع تر معاشی تے سماجی ترقی دے حصول دا ہک ذریعہ اے، بہتر ڈیجیٹل رابطے نال تیز تر، سستی تے بہتر خدمات دی فراہمی کوں ممکن بݨاوݨ اچ مدد ملسی اتے معیشت دے مختلف شعبیاں اچ بے شمار موقع پیدا تھیسن۔ سپیکٹرم دی زیادہ دستیابی تے فائیوجی خدمات دے اجراء نال مصنوعی ذہانت، بلاک چین تے ویب 3.0 سویں ابھردی ہوئی ٹیکنالوجیز کوں وی فروغ ملسی، جیندے نال پاکستان ہک جدید ڈیجیٹل معیشت آلے پاسے منتقل تھی سڳسی۔ اے ڳالھیں انہاں منگل کوں اتھاں پاکستان ٹیلی کمیونیکیشن اتھارٹی (پی ٹی اے) ولوں تھیوݨ آلی این جی ایم ایس/فائیوجی سپیکٹرم نیلامی دی تقریب توں خطاب اچ کیتا۔ انھاں نیلامی کوں ہک تاریخی سنگِ میل قرار ݙیندیں ہوئیں آکھیا جو ایں اقدام نال پاکستان دی ڈیجیٹل تبدیلی اچ تیزی امسی اتے ملک دی ڈیجیٹل معیشت کوں مضبوط بݨاوݨ اچ مدد ملسی۔ وزیرِ خزانہ آکھیا جو گزریل ڈیڈھ سال دے دوران ایں نیلامی دے فریم ورک کوں حتمی شکل ݙیوݨ کیتے کیتی ونڄݨ آلی وسیع کوششاں دے نتیجے کوں اج عملی شکل اچ ݙیکھݨ باعثِ مسرت اے۔ انھاں ݙسایا جو سپیکٹرم کمیٹی، جیندے صدر او خود ہن، تفصیلی غور و خوض دے بعد ہک متوازن فریم ورک تیار کیتا جیندے مقصد ہک طرف ودھ توں ودھ ریونیو حاصل کرݨ اتے ݙوجھے پاسے پاکستان دے ڈیجیٹل سفر کوں اڳوں ودھاوݨ کیتے ہک سازگار ماحولیاتی نظام پیدا کرݨا ہئی۔ وزیرِ خزانہ ایں ڳالھ دا وی اعتراف کیتا جو سپیکٹرم نیلامی دا عمل ایندے توں پہلے 2021 اچ وزیر برائے انفارمیشن ٹیکنالوجی دی سابقہ مدت دے دوران شروع کیتا ڳیا ہئی۔ انھاں مختلف حکومتاں دے دوران پالیسی دے تسلسل کوں سراہیندیں ہوئیں آکھیا جو بھانویں حکومتاں بدلدی رہندن، مگر پالیسی دی مستقل سمت ترقی کوں یقینی بݨیندی اے۔ انھاں ایں نیلامی کوں انھاں تمام متعلقہ فریقین کیتے ہک اہم لمحہ قرار ݙتا جنھاں ایں اقدام کوں پایہ تکمیل تئیں پڄاوݨ اچ کردار ادا کیتا۔انھاں ایں ڳالھ تے زور ݙتا جو حکومت دا کردار ایجھا سازگار ماحول فراہم کرݨ اے جیندے ذریعے نجی شعبہ معاشی ترقی دی قیادت کر سڳے۔ انھاں آکھیا جو سپیکٹرم دی زیادہ دستیابی تے فائیوجی خدمات دے اجراء نال مصنوعی ذہانت، بلاک چین تے ویب 3.0 جہیں ابھردی ہوئی ٹیکنالوجیز کوں وی فروغ ملسی، جیندے نال پاکستان ہک جدید ڈیجیٹل معیشت دی طرف منتقل تھی سڳسی۔