خارجہ پالیسی تے تبصرہ کریندے ویلھے آئین تے قومی مفاد کوں مدنظر رکھیا ونڄے، اعظم نذیر تارڑ

اسلام آباد۔ 10 مارچ (اے پی پی) وفاقی وزیرِ قانون تے انصاف اعظم نذیر تارڑ آکھیا جو پاکستان ہک ذمہ دار تے ایٹمی ریاست اے، ایں کیتے عوام تے میڈیا کوں بین الاقوامی معاملات خصوصاً خارجہ پالیسی تے اظہارِ رائے ݙیندے ویلھے آئین تے قومی مفاد کوں مدنظر رکھݨا چاہیدے۔ منگل کوں پی ٹی وی ہیڈ کوارٹر اچ نیوز کانفرنس توں خطاب کریندیں ہوئیں وفاقی وزیرِ قانون تے انصاف آکھیا جو پاکستان خطے اچ اڄوکی کشیدگی دے دوران ہمیشہ متوازن تے ذمہ دارانہ موقف اختیار کیتے۔ انھاں آکھیا جو جݙݨ وی عالمی یا علاقائی سطح تے کوئی واقعہ پیش آیا، پاکستان سفارتی اصولاں دے مطابق ردِعمل ݙتا تے دوست ممالک دے نال آپݨے دیرینہ تعلقات کوں مدنظر رکھیا۔ وزیرِ قانون آکھیا جو آئینِ پاکستان دے آرٹیکل 19 دے تحت ہر شہری کوں اظہارِ رائے دی آزادی حاصل اے، تاہم ایں آزادی دے نال کجھ معقول پابندیاں وی عائد ہن۔ انھاں پابندیاں دا تعلق اسلام دی عظمت، پاکستان دی سلامتی، دفاع، دوست ممالک دے نال تعلقات، عوامی نظم و ضبط، اخلاقیات تے عدالت دی توہین سویں معاملات نال اے۔ انھاں آکھیا جو گزریل ݙینہ سوشل تے الیکٹرانک میڈیا تے بعض تبصرے ایجھے ݙیکھݨ اچ آئن جنھاں نال سفارتی سطح تے غلط تاثر پیدا تھی سڳدے۔ انھاں دا آکھݨ ہئی جو کہیں وی فرد یا گروہ کوں اے حق حاصل کائنی جو او پاکستان دی خارجہ پالیسی دے بارے اچ ایجھے بیانات ݙیوے جیندے نال دوست ملکاں دے نال تعلقات متاثر ہوون۔