وزیر اعظم محمد شہباز شریف ایران ، مشرق وسطٰی تے خلیج سمیت سمورے خطے اچ جنگی صورتحال ڈیھدے ہوئے معیشت دے استحکام کیتے کفایت شعاری، عوامی ریلیف ، سادگی تے توانائی دی بچت سانگے 14 نکاتی فیصلیاں دا اعلان ، وزیر اعظم محمد شہباز شریف دا قوم نال خطاب

اسلام آباد۔9مارچ (اے پی پی):وزیر اعظم محمد شہباز شریف ایران ، مشرق وسطٰی تے خلیج سمیت سمورے خطے اچ جنگی صورتحال ڈیھدے ہوئے معیشت دے استحکام کیتے کفایت شعاری، عوامی ریلیف ، سادگی تے توانائی دی بچت سانگے 14 نکاتی فیصلیاں دا اعلان کیتا اے جیندے تحت اشرافیہ کیتے مراعات کوں محدود کریندے ہوئے سرکاری خرچے اچ گھٹکی تے بچت کیتی ویسی ۔ سنوار کوں وزیر اعظم محمد شہباز شریف قوم توں خطاب کریندے ہوئے خطے دی صورت حال تے قوم کوں اعتماد اچ گھدا تے حکومتی فیصلیاں دا اعلان کیتاجیندے اچ ڈوں مہینے کیتے سرکاری گاڈیاں دے پٹرول دی مد اچ 50 فیصد فوری کٹوتی ،سرکاری گاڈیاں دے استعمال اچ 60 فیصد گھٹکی ، کابینہ ارکان ، وزیراں ، مشیراں ،معاونین خصوصی دیاں تنخواہیں روکنڑ ، اسمبلی دیاں تنخواہاں اچ 25 فیصد کٹوتی ، گریڈ ویھ توں اتے افسر جنھاں دی تنخواہ ترائے لکھ توں ودھ اے ۔ڈو ڈینھ دی تنخواہ دی کٹوتی ، سرکاری محکمیاں دے خرچے اچ 20 فیصد گھٹکی ، ملکی فیدے کیتے ناگزیر وجہ توں سوا وزیراعظم،گورنرز،وزیر اعلیٰ ،وفاقی تے صوبائی وزیر ،مشیر ،معاونین خصوصی اتے سرکاری افسریں دے باہرلے ملکاں دے دوریاں تے پابندی ، 50 فیصد سٹاف دے ورک فرام ہوم ، سرکاری دفتر پنج دی جاء تے چار ڈینھ کھولنڑ ، سکولاں اچ ڈوں ہفتے دیاں چھٹیاں ، اعلیٰ تعلیم کیتے آن لائن کلاسز سودے کئی اقدام شامل ان ۔ وزیر اعظم آکھے جو اج خطے دے مسلیاں بارے ہک نہایت سنجیدہ تے خطرے آلی صورت حال بارے قوم توں مخاطب ہاں۔انھاں دا آکھنڑ ہا بد قسمتی نال سمورا خطہ، بشمول ایران اتے مشرق وسطی ایں ویلھے ہک شدید جنگی صورتحال دی پاکستان ایں کشیدہ صورت حال اچ حتی المقدور کوشش کریندا پئے جو معاملات تدبر تے سفارت کاری دے ذریعے حل تھیون ۔ڈوجھے پاسوں اساکوں آپدی مغربی سرحداں تے وی دہشت گردی دا سامنھڑا اے۔ افغانستان اچ موجود دہشت گرداں دے سہولت کاراں ولوں ہوونڑ آلی دراندازی تے حملیاں دے جواب اچ ساڈی بہادر فوج ملخ دی سلامتی تے خود مختاری دے تحفظ، تے شہریاں دے جان تے مال دی حفاظت یقینی بنڑاونڑ دا مقدس فریضہ انتہائی محنت نال نبھیندی پئی اے جیندے تے میں انھاں کوں سلام پیش کریندا ۔ وزیر اعظم آکھے جو ایران اچ تھیونڑ آلے اسرائیلی بہیمانہ حملیاں اچ آیت اللہ سید علی خامنائی ، انھاں دے اہلِ خانہ تے معصوم ایرانی بھراواں تے بھینڑیں دی شہادت تےحکومت پاکستان تے عوام ڈو نگھے ڈکھ دا اظہار کیتے تے اساں حملیاں دی ڈوں ٹوک لفظیں اچ مذمت کریندے ہاں ۔ پاکستان آپدے بھرا مسلم ملکیں سعودی عرب، متحدہ عرب امارات، قطر، کویت، بحرین، اردن، لبنان، عمان، ترکیہ تےآذربائیجان تھیونڑ آلے حملیاں دی وی شدید مذمت تے جانی زیان تے افسوس کریندے۔ وزیر اعظم آکھے جو ایں اوکھے حالات اچ میڈی برادر ملکیں دے سربراہواں نال تفصیلی گالھ مہاڑ تھئی اے تے پوری قوم ولوں انھاں ملکیں دی عوام تے قیادت کوں اے سنہیا ڈتے جو پاکستان ایں آزمائش اچ نال اے ۔وزیر اعظم آکھے جو ایں دنیا اچ ہک ملخ دے بحران، کجھ ڈینھاں اچ ڈوجھے ملکیں اچ کھنڈ ویندے۔ عالمی منڈی اچ خام تیل دا مل جیڑھا کجھ ڈینھ پہلے گھٹ ودھ 60 ڈالر فی بیرل ہئی ، او اچنڑ چیت ودھ تے 100 ڈالرتوں ودھ گئے جے حالات بگڑدے رہیے تاں قیمتاں قابو توں نکل ویسن جیندے نال عام آدمی دی زندگی سب توں ودھ متاثر تھیسی ۔ وزیر اعظم آکھے جو ساڈی معیشت ، صنعتاں ، ٹرانسپورٹیشن تے روزمرہ شئیاں دا انحصار خلیج توں آئے تیل تے گیس دی فراہمی تے اے ۔ ایں حقیقت کوں سامنڑھے رکھدے ہوئے حکومت معیشت دے استحکام کیتے بہوں اہم تے اوکھے فیصلے کیتے ۔ایجھے انتظامی تے معاشی فیصلے جیڑھے اصلوں آسان نہ ہن ۔ اساں مالیاتی نظم تے ضبط کوں چنگا بنڑاونڑ ، تے توانائی دے شعبے اچ اصلاحات متعارف کرائیاں تاں جو ملک دے تو انائی بحران کوں گھٹ کیتا ونجے جیڑھلے دنیا اچ کشیدگی ودھدی اے یا خطے اچ جنگ جمدی اے تاں اوندے اثرات براہ راست توانائی دیاں قیمتیاں تے پوندن پر قوم کوں یقین ڈیونداں جو آپدی حکومت ہر ممکن کوشش کریندی پئی اے جو اوکھے عالمی حالات باوجود پاکستان دی معیشت کوں مستحکم رکھیا ونجے ۔وزیر اعظم آکھے جو حکومت کوں حالیہ ڈینھاں اچ تیل دے مل اچ ودھارا کرنڑ ہک وڈا اوکھا تئ دل تے پتھر رکھ تے فیصلہ کیتا جیندی منظوری ڈیندے ہوئے میڈا ہاں تے دماغ ہک کشمکش توں لنگھے ۔ قوم گواہ اے جو کئی سالیں توں پاکستان کوں ڈاڈھے اوکھے معاشی حالات دا سامنھڑا کرنا پیا ۔ ہک ویلھےایجھا آیا جیڑھلے ملک کوں ڈیوالہ تھیونڑ خطرے دا سامنھڑا ہا۔ انھاں مشکل ترین حالات اچ اساں سیاسی فیدے کوں کنڈھ پچھوں سٹ تے ریاست تے معیشت دے فیدے کوں ترجیح ڈٹی ۔ ایں طرح مہنگائی دی شرح اچ گھٹکی تھئی، پالیسی ریٹ گھٹ ودھ ادھا تھی چکے ، روپے دی قدر مستحکم اے تے بجلی دیاں قیمتاں اچ وی وڈی محنت اچ گھٹکی لائی گئی اے۔۔اے کامیابی کہیں ہک فرد دی نی جڈاں جو سموری قوم دی دعاواں تے سانجھیاں کوششاں دا پھل اے ۔ وزیر اعظم آکھے جواو ایں احساس ذمہ واری نال اج ہک واری ول میں یقین ڈیویندے جو اساں ہر ممکن کوشش کریندے ہاں جو عوام تے بار گھٹ توں گھٹ سٹیاونجے ، میکوں عام آدمی دی تکلیف دا اتے عام آدمی دے درد دا پورا احساس اے۔ میں ایں حقیقت توں بخوبی آگاہ ہاں جیڑھلے بزرگاں دی دوائی کیتے پیسے گھٹ تھی ونجن ، یا بالیں دی تعلیم تے فیس دی فکر ہاں تے بار بنڑ ونجے ، تاں ہک پیو ، ہک ماء ہک پتر دے ہاں تے لنگھدی اے ۔ اے او درد اے جیڑھا لفظیں اچ بیان نی کرسگدا۔ وزیر اعظم ایں خدشے دا اظہار کیتے تے آونڑ آلے ڈینھاں اچ تیل دیاں قیمتاں اچ بئے ودھارے دا امکان اے، پرحکومت دی بھر پور کوشش ہوسی جو تیلدے مل اچ ودھارے دا بار عام آدمی تے نہ پووے ، ایں مقصد سانگے ڈینھ رات مشاورت تے کوششاں جاری ان اللہ تعالیٰ چاہسی تاں تساکوں مایوس نہ کریساں ۔انھاں دا آکھنڑ اے جو کانفرنسنگ تے آن لائن میٹنگ کوں ترجیح ڈتی ویسی ۔ وزیر اعظم آکھے جو اساڈی پہلی ترجیح پاکستان دی خوشحالی، استحکام، ترقی اے ۔ انھاں شاعر مشرق علامہ محمد اقبال دے ایں شعر تے تقریر دا اختتام کیتا جو “آج بھی ہو جو براہیم کا ایماں پیدا آگ کر سکتی ہے انداز گلستاں پیدا”