فائیو جی سپیکٹرم دی نیلامی نال پاکستان اچ ڈیجیٹل کنیکٹیویٹی دے شعبے اچ انقلاب امسی، وفاقی وزیرِ اطلاعات عطاء اللہ تارڑ دا تقریب توں خطاب

اسلام آباد۔ 10 مارچ (اے پی پی) وفاقی وزیرِ اطلاعات تے نشریات عطاء اللہ تارڑ آکھیا جو فائیو جی سپیکٹرم دی نیلامی نال پاکستان اچ ڈیجیٹل کنیکٹیویٹی دے شعبے اچ انقلاب امسی۔ منگل کوں اتھاں پی ٹی اے ولوں فائیو جی سپیکٹرم دی نیلامی دا عمل مکمل تھیوݨ دے بعد تقریب توں خطاب کریندیں ہوئیں وفاقی وزیرِ اطلاعات آکھیا جو وزیراعظم محمد شہباز شریف دی واضح ہدایات ہن جو پاکستان اچ تھیوݨ آلے کہیں وی نیلامی دے عمل کوں براہِ راست نشر کیتا ونڄے۔ اج پاکستان اچ فائیو جی سپیکٹرم دی شفاف نیلامی دے عمل کوں پوری دنیا ݙٹھے۔ شفافیت کوں یقینی بݨاوݨ کیتے نیلامی دے ہر پہلو کوں براہِ راست نشر کیتا ڳیا۔ انھاں آکھیا جو فائیو جی سپیکٹرم دی سافٹ ویئر دے ذریعے آن لائن آکشن ہئی، ایں عمل اچ تمام ٹیلی کام کمپنیاں شرکت کیتی جیندے تے میں انھاں دا مشکور ہاں۔ انھاں آکھیا جو کہیں وی نجی شعبے دے ادارے دا سرکاری شعبے تے اعتماد دا اظہار اتے عمل دی شفافیت کوں تسلیم کرݨ ٻہوں وݙی کامیابی اے۔ پبلک پرائیویٹ سیکٹرز آپسی تعاون نال کم کریندن تاں معیشت دا پہیہ اڳوں ودھدے۔ وفاقی وزیرِ اطلاعات فائیو جی سپیکٹرم دی نیلامی دا عمل مکمل تھیوݨ تے وفاقی وزیرِ انفارمیشن ٹیکنالوجی، سیکرٹری آئی ٹی، ممبر ٹیلی کام، چیئرمین پی ٹی اے تے پی ٹی اے دی پوری ٹیم کوں مبارکباد پیش کریندیں ہوئیں آکھیا جو اساں فائیو جی آلے پاسے ویندے پئیوں، اے پاکستان کیتے بہت وݙا ݙینہہ اے۔