وفاقی وزیر ڈاکٹر مصدق ملک نال سویڈن دی سفیر دی ملاقات

اسلام آباد۔ 10 مارچ (اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک نال پاکستان اچ تعینات سویڈن دی سفیر الیگزینڈرا برگ وان لِنڈے ملاقات کیتی۔ ملاقات اچ ݙوہیں پاسوں عالمی صورتحال تے ایندے ممکنہ اثرات تے ڳالھ مہاڑ کیتی ڳئی۔وزارتِ موسمیاتی تبدیلی توں جاری بیان موجب ملاقات اچ سویڈن دی سفیر ڈاکٹر مصدق ملک کوں آرکٹک سرکل اسمبلی اچ شرکت دی دعوت ملݨ تے مبارخ ݙتی تے آکھیا جو اے ایں ڳالھ دا ثبوت اے جو عالمی برادری ایں حقیقت توں واقف تھیندی پئی اے جو موسمیاتی مسئلے سرحداں تئیں محدود کائنی بلکہ عالمی سطح تے مشترکہ اقدامات دے محتاج ہن۔ ایں موقع تے وفاقی وزیر ایں ڳالھ تے زور ݙتا جو او ملک جیڑھے گلیشیئرز دے پگھلݨ توں براہِ راست متاثر تھیندے پئن، جیویں آرکٹک خطے دے ملکاں تے ہمالیائی سلسلے نال جڑئے ملکاں بشمول پاکستان، انھاں وچال نیڑے تعاون ضروری اے۔انھاں آکھیا جو ایجھے تعاون نال تحقیق تے مشترکہ پالیسی اقدامات کوں ودھارا ݙتا ونڄ سڳدے تاں جو موسمیاتی تبدیلی تے گلیشیئرز دے پگھلݨ نال پیدا تھیوݨ آلے چیلنجز دا مؤثر مقابلہ کیتا ونڄ سڳے۔ سفیر سویڈن دے نقطہ نظر تے روشنی سٹیندے آکھیا جو سویڈن موسمیاتی مسئلیں کوں صرف ترقیاتی تناظر اچ کائنی بلکہ نجی شعبے دی فعال شمولیت دے نال وی ݙیہدے۔ ایں ضمن اچ انھاں وفاقی وزیر کوں ݙسایا جو سویڈن دا مالیاتی ادارہ (ایس ای بی) جیڑھا پہلے ہی گرین قرضیں دے شعبے اچ کم کریندا پئے، پاکستان اچ پاݨی، بنیادی ڈھانچے تے توانائی دے منصوبیں کیتے ہک کثیر ملکی فنڈ قائم کرݨ دے امکان دا جائزہ گھندا پئے۔انھاں نے ݙسایا جو ایں اقدام دا مقصد مقامی کمپنیاں کوں موسمیاتی منصوبیں اچ سرمایہ کاری دے دوران پیش آںدے خطریں کوں گھٹ کرݨ اچ مدد ݙیوݨ اے۔ مجوزہ فنڈ دے تحت گرین کلائمیٹ فنڈ (جی سی ایف) دے نال وی اشتراکِ عمل متوقع اے تاں جو موسمیاتی فنانسنگ کوں ودھاراملے۔ وفاقی وزیر ڈاکٹر مصدق ملک ایں تجویز دا خیر مقدم کریندے گہری دلچسپی ݙکھائی تے تجویز ݙتی جو آوݨ آلے ہفتے وزارت تے ایس ای بی دے نمائندیں وچال ہک تفصیلی اجلاس کیتا ونڄے تاں جو ایں منصوبے تے تعاون دے پہلوواں تے مزید غور تھی سڳے۔ انھاں آکھیا جو پاکستان اچ پاݨی تے توانائی دے شعبیں اچ موسمیاتی سرمایہ کاری دے وݙے موقع موجود ہن، جیندے نال مستقبل اچ بہتری تھیسی۔