صحت دا نظام مضبوط بنیاداں تے استوار ہووݨا چاہیدے، نرسنگ کونسل کوں تکڑا بݨاوݨ ناگزیر اے، سید مصطفیٰ کمال

اسلام آباد۔ 10 مارچ (اے پی پی) وفاقی وزیرِ صحت سید مصطفیٰ کمال آکھیا جو نرسنگ دا شعبہ صحت دے نظام اچ اہمیت رکھیندے، مریضاں دی معیاری نگہداشت دا انحصار نرسنگ سٹاف دی پیشہ ورانہ صلاحیتاں تے ہوندے۔ پاکستان اچ ایں ویلھے تقریباً 9 لکھ نرسز دی کمی اے جݙاں جو عالمی سطح تے تقریباً 25 لکھ نرسز دی طلب موجود اے۔ اے ڳالھ انہاں وزارتِ قومی صحت اچ پاکستان نرسنگ کونسل دے ݙوجھے اجلاس توں خطاب کریندے آکھی۔انھاں آکھیا جو مطلوبہ اہداف دے حصول کیتے پاکستان نرسنگ کونسل کوں مضبوط تے مؤثر بݨاوݨ ناگزیر اے تے اینکوں بین الاقوامی معیار موجب جدید خطوط تے استوار کرݨ دا پختہ عزم کیتا ڳئے۔ وزیرِ صحت آکھیا جو نرسنگ کونسل دی متاثرہ ساکھ دی بحالی کیتے عملی اقدامات ضروری ہن تے ادارے اچ میرٹ تے شفافیت دے ودھارے کیتے ساریں کوں رل تے کم کرݨا ہوسی۔ مصطفیٰ کمال ارکان نال خطاب کریندے آکھیا جو تساں سارے پیشہ ور لوک ہیوے ، ادارے دی ساکھ دی بحالی کیتے بھرپور اقدامات کیتے ونڄن۔ انھاں آکھیا جو پاکستان اچ نرسنگ دے شعبے اچ بے پناہ صلاحیت موجود اے تے ایجھے نرسنگ کالجز کوں ودھارا ݙتا ونڄے جیڑھے اعلیٰ معیار دی نرسز تیار کرن جیڑھیاں نہ صرف پاکستان بلکہ دنیا اچ ملک دا ناں روشن کرن۔ وفاقی وزیرِ صحت آکھیا جو پاکستان دا صحت دا نظام مضبوط بنیاداں تے کھڑا ہووݨا چاہیدے۔ اجلاس دے دوران سپیشل سیکرٹری ہیلتھ اسلم غوری کوں پاکستان نرسنگ کونسل دا صدر جݙاں جو ڈاکٹر سید علی فرحان راضی کوں نائب صدر منتخب کیتا ڳیا۔