سائبر سکیورٹی کوں مضبوط بݨاوݨ ضروری اے، وفاقی وزیر آئی ٹی شزہ فاطمہ خواجہ

اسلام آباد۔ 11 مارچ (اے پی پی) وفاقی وزیر برائے انفارمیشن ٹیکنالوجی تے ٹیلی کمیونیکیشن شزہ فاطمہ خواجہ آکھیا جو ڈیجیٹل ترقی تے ٻاہرلی سرمایہ کاری اچ مکمل اعتماد پیدا کرݨ کیتے ملک اچ سائبر سکیورٹی کوں مضبوط بݨاوݨ ضروری اے۔ انھاں ݙسایا جو 32 توں ودھ سرکاری خدمات کوں مکمل طور تے ڈیجیٹل بݨا ݙتا ڳئے اتے موبائل ایپس دے ذریعے نادرا دی دستاویزات تئیں رسائی ممکن تھیندی پئی اے۔ اے ڳالھیں انہاں بدھ کوں سائبر سکیورٹی بارے ہک تقریب توں خطاب کریندیں ہوئیں کیتا۔ انھاں آکھیا جو جݙاں تئیں پاکستان اچ مضبوط سائبر سکیورٹی نظام قائم نئی تھیندا، اوں ویلھے تئیں بیرونی سرمایہ کاری اچ مکمل اعتماد پیدا نئی تھی سڳدا۔ انھاں آکھیا جو سائبر سکیورٹی صرف ٹیکنالوجی دا معاملہ کائنی بلکہ اے ہر شہری دی ذاتی شناخت تے قومی سلامتی دے سارے پہلوواں نال جڑی ہوئی اے۔ شزہ فاطمہ آکھیا جو حکومت سائبر سکیورٹی ایکٹ تے متعلقہ اداریاں کوں فعال بݨاوݨ تے کم کریندی پئی اے تانجو پاکستان کوں ڈیجیٹل معیشت اچ محفوظ بݨایا ونڄ سڳے، جیندے نال ملک دا وقار بلند تھیسی۔