پائیدار معاشی ترقی کیتے مضبوط تے مؤثر کیپٹل مارکیٹ ٻہوں اہم اے، وزیرِ خزانہ محمد اورنگزیب

اسلام آباد۔ 11 مارچ (اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو پائیدار معاشی ترقی کیتے مضبوط تے مؤثر کیپٹل مارکیٹ ٻہوں اہم اے، متحرک کارپوریٹ بانڈ مارکیٹ دی ترقی طویل مدتی مقامی بچتاں کوں متحرک کرݨ تے نجی شعبے دی سرمایہ کاری کوں ودھارا ݙیوݨ اچ اہم کردار ادا کریسی۔ انھاں اے ڳالھ اتھاں کیپٹل مارکیٹ ڈویلپمنٹ کونسل (سی ایم ڈی سی) دے اجلاس دی صدارت کریندے آکھی۔ اجلاس اچ پاکستان دی کیپٹل مارکیٹس کوں مضبوط بݨاوݨ کیتے جاری اصلاحات دا جائزہ ڳھدا ڳیا۔وزیرِ خزانہ آپݨے ابتدائی کلمات اچ آکھیا جو مضبوط تے مؤثر کیپٹل مارکیٹ پائیدار معاشی ترقی کیتے ٻہوں اہم اے کیوں جو ایندے ذریعے کارپوریشنز کوں طویل مدتی سرمایہ حاصل کرݨ دا موقع ملدے۔ انھاں آکھیا جو پاکستان کوں بتدریج ہک متوازن مالیاتی نظام دے پاسے ودھݨا ہوسی جتھاں کیپٹل مارکیٹس بینکنگ شعبے دے نال رل تے معیشت دی مالی ضرورتاں کوں پورا کر سڳن۔ انھاں نظام اچ موجود رکاوٹاں کوں دور کرݨ تے زور ݙتا تے ایس ای سی پی کوں آگاہی مہم مزید موثر بݨاوݨ دی ہدایت کیتی۔اجلاس اچ انھاں پالیسی اقدامات تے وی غور کیتا ڳیا جیندے نال کمپنیاں کوں بینک قرضیں دے متبادل دے طور تے کیپٹل مارکیٹس توں فنڈز حاصل کرݨ دی ترغیب ملے۔ وزیرِ خزانہ آکھیا جو کارپوریٹ بانڈ مارکیٹ کوں گہرا کرݨ نال بینک قرضیں تے ضرورت توں ودھ انحصار گھٹ تھیسی۔ اجلاس اچ ٹیکس فریم ورک دا جائزہ وی ڳھدا ڳیا تاں جو ٹیکس ڈھانچے کوں معقول بݨایا ونڄ سڳے۔ اجلاس اچ پاکستان سٹاک ایکسچینج، سٹیٹ بینک تے ٻئے اداریں دے نمائندیں شرکت کیتی تے بریفنگ ݙتی۔