صدرِ مملکت آصف علی زرداری دی ماریشس دے صدر، حکومت تے عوام کوں قومی ݙینہہ دے موقع تے مبارکباد

اسلام آباد۔ 12 مارچ (اے پی پی) صدرِ مملکت آصف علی زرداری جمہوریہ ماریشس دے صدر دھرمبیر گوکھول، حکومت تے ماریشس دی عوام کوں انھاں دے قومی ݙینہہ دے موقع تے مبارکباد ݙتی ۔ خمیس کوں ایوانِ صدر دے پریس ونگ دے مطابق صدرِ مملکت آپݨے تہنیتی سنیھے اچ آکھیا جو پاکستان ماریشس دے نال آپݨے خوشگوار تے دوستانہ تعلقات کوں ٻہوں اہمیت ݙیندے، جیہڑے آپسی اعتماد تے تعمیری تعاون نال جڑے ہوئن۔ انھاں آکھیا جو ݙوہیں ملکاں دی قیادت وچال ودھدا ہویا رابطہ تے مشترکہ مفادات دے شعبیاں اچ تعاون دا مسلسل فروغ حوصلہ افزاء اے۔ صدر ایں ڳالھ تے وی زور ݙتا جو عوامی سطح تے رابطے ودھاوݨ دے نال نال تجارت، تعلیم، ثقافت تے سیاحت دے شعبیاں اچ تعاون کوں ٻیا ودھا تے ݙوہیں ملکاں وچال سانجھ کوں ٻیا مضبوط بݨاوݨ دی صلاحیت موجود اے۔ صدر آصف علی زرداری ایں اعتماد دا اظہار کیتا جو پاکستان تے ماریشس وچال دوستانہ تعلقات آوݨ آلے ورھیاں اچ ٻئے مستحکم تھیسن اتے ݙوہیں ملکاں دی عوام دے باہمی مفاد ودھسن ، جیندے نال ݙوہیں پاسے خوشحالی تھیسی۔ صدرِ مملکت صدر دھرمبیر گوکھول دی چنگی صحت تے ماریشس دی عوام کیتے نیک تمنائیں دا اظہار کیتا۔