تیز رفتار تے قابلِ اعتماد انٹرنیٹ ملکی معیشت، معاشرت، تعلیم، صحت تے قومی سلامتی کیتے بنیادی اہمیت رکھیندے، وفاقی وزیر شزا فاطمہ خواجہ

اسلام آباد۔ 12 مارچ (اے پی پی) وفاقی وزیر برائے انفارمیشن ٹیکنالوجی تے ٹیلی کمیونیکیشن شزا فاطمہ خواجہ آکھیا جو تیز رفتار تے قابلِ اعتماد انٹرنیٹ ملکی معیشت، معاشرت، تعلیم، صحت تے قومی سلامتی کیتے بنیادی اہمیت رکھیندے، فائیو جی دی نیلامی نال نہ صرف انٹرنیٹ سروس دی فراہمی بہتر تھیسی بلکہ اے وزیراعظم محمد شہباز شریف دے ڈیجیٹل پاکستان وژن کوں مضبوط بنیاد فراہم کریسی۔ اے ڳالھیں انھاں فائیو جی سپیکٹرم دی اسائنمنٹ تقریب توں خطاب دے دوران کیتا۔ انھاں آکھیا جو پاکستان اچ فائیو جی سپیکٹرم دی نیلامی دا پہلا مرحلہ کامیابی نال مکمل تھی ڳئے جیندے تحت 480 میگا ہرٹز سپیکٹرم ترائے موبائل آپریٹرز (جاز، زونگ تے یوفون) حاصل کیتے، ایں نیلامی دے ذریعے حکومت کوں تقریباً 507 ملین ڈالر آمدن تھئی۔ انھاں دا آکھݨ ہئی جو نیلامی دے پہلے مرحلے دے بعد ہک ݙینہہ دے وقفے نال اسائنمنٹ مرحلے دا عمل شروع تھی ڳئے جیندے اچ مختلف بینڈز اچ سپیکٹرم دی حتمی تقسیم کیتی ڳئی اے جݙاں جو 3.5 گیگا ہرٹز بینڈ دے عمل دا باقاعدہ افتتاح وی کر ݙتا ڳئے۔ شزا فاطمہ خواجہ آکھیا جو اے نیلامی کئی حوالے نال تاریخی اے کیونجو ایں توں پہلے اتنی وݙی مقدار اچ سپیکٹرم کݙاہیں نیلام کائنی تھیا۔ انھاں ݙسایا جو پاکستان 1987 توں ہݨ تئیں مجموعی طور تے صرف 274 میگا ہرٹز سپیکٹرم تے کم کریندا پیا ہئی جیندے پاروں ملک کوں خطے اچ سپیکٹرم دی کمی دا سامݨا ہئی، تاہم ایں نیلامی دے بعد مجموعی سپیکٹرم تقریباً ساڈھے ست سو میگا ہرٹز تئیں پڄ ڳئے، جیندے نال پاکستان ہݨ عالمی اوسط دے قریب آ ڳئے۔ وفاقی وزیر آکھیا جو تیز رفتار انٹرنیٹ اج دی معیشت کیتے بنیادی اہمیت رکھیندے، ایں نیلامی نال نہ صرف فور جی سروس بہتر تھیسی بلکہ پاکستان باضابطہ طور تے فائیو جی دور اچ وی داخل تھی ویسی۔ انھاں آکھیا جو جدید ٹیکنالوجی، بالخصوص آرٹیفیشل انٹیلی جنس کیتے تیز رفتار انٹرنیٹ ضروری اے، ایندے نال نینگراں کوں تعلیم تے روزگار دے نویں مواقع ملسن۔ چیئرمین پی ٹی اے میجر جنرل (ر) حفیظ الرحمٰن آکھیا جو سپیکٹرم اسائنمنٹ دا عمل شفافیت کوں یقینی بݨاوݨ کیتے مکمل طور تے سافٹ ویئر دے ذریعے کیتا ڳئے۔ انھاں ݙسایا جو اسائنمنٹ مرحلے اچ مختلف آپریٹرز کوں اے اختیار ݙتا ویندا پئے جو او متعلقہ بینڈ اچ آپݨی فریکوئنسی دی حتمی پوزیشن منتخب کرن، جیندے نال سسٹم ٻیا بہتر تھیسی۔