مشرقِ وسطیٰ دے بحران دے پرامن تے مذاکراتی حل کیتے سفارتی رابطے ول بحال کرݨ دی لوڑھ اے، ترجمان دفترِ خارجہ طاہر حسین اندرابی دی پریس بریفنگ

اسلام آباد۔ 12 مارچ (اے پی پی) پاکستان مشرقِ وسطیٰ دے بحران دے پرامن تے مذاکراتی حل کیتے سفارتی رابطے ول بحال کرݨ دی لوڑھ تے زور ݙتے۔ ترجمان دفترِ خارجہ طاہر حسین اندرابی پریس بریفنگ اچ مشرقِ وسطیٰ اچ ترائے ہفتے توں جاری کشیدگی، تشدد تے مسلح حملیں دے تناظر اچ پاکستان دے موقف کوں اجاگر کریندے آکھیے جو پاکستان ایران دے خلاف بلا جواز حملیں دی مذمت کیتی اے، اے حملے ایجھے ویلھے کیتے ڳئن جݙاں سفارتی کوششاں ہک پرامن تے مذاکرات دے ذریعے حل تئیں پڄݨ کیتے جاری ہن۔ انھاں آکھیا جو ایں قسم دے اقدامات پورے خطے دے امن و استحکام کوں ضیان پڄا سڳدن تے ایندے ݙو رس نتیجے نکل سڳدن۔ترجمان ایران دی طرفوں بھرا ملکاں سعودی عرب، بحرین، اردن، کویت، قطر تے متحدہ عرب امارات تے حملیں دی سخت لفظاں اچ مذمت کریندے انھاں سارے بھرا ملکاں دے نال مکمل یکجہتی دا اظہار کیتا۔ انھاں آکھیا جو پاکستان ایں ڳالھ تے زور ݙتے جو ودھ توں ودھ تحمل دا مظاہرہ کیتا ونڄے، اے بلا اشتعال حملے خلیجی بھرا ریاستاں دی خودمختاری دی کھلی خلاف ورزی ہن۔ ترجمان آکھیا جو پاکستان انھاں اڄوکے حملیں تے وی گہری تشویش دا اظہار کیتے جیڑھے بھرا ملکاں ترکیہ تے آذربائیجان کوں نشانہ بݨا تے کیتے ڳئن۔ انھاں آکھیا جو اے حملے بین الاقوامی قانون تے ریاستاں وچال تعلقات دے اصولاں دی واضح خلاف ورزی ہن تے اے خطے کوں مزید کشیدگی آلے پاسے دھکیل سڳدن۔ترجمان آکھیا جو موجودہ جھیڑے اچ پاکستان مسلسل ترے بنیادی نکات تے زور ݙیندا رہیے جنھاں اچ ریاستاں دی خودمختاری تے علاقائی سالمیت دا احترام، ہک ٻئے دے خودمختار علاقیں اچ طاقت دے استعمال توں گریز تے بین الاقوامی قانون سودھے اقوامِ متحدہ دے چارٹر اچ درج اصولاں دی پاسداری کرݨ شامل اے۔ انھاں ایں ڳالھ تے زور ݙتا جو بحران دے پرامن تے مذاکراتی حل کیتے سفارتی رابطے ول بحال کیتے ونڄن۔طاہر حسین اندرابی آکھیا جو ایں دوران متحدہ عرب امارات اچ ݙو پاکستانی شہری جاں بحق تھئن، اساں انھاں قیمتی جاناں دے ضیان تے دلی تعزیت دا اظہار کریندوں۔ انھاں آکھیا جو متحدہ عرب امارات اچ پاکستان دے سفارتی مشنز ݙکھی خانداناں دے نال رل تے جاں بحق شہریاں دی میتاں کوں پاکستان واپس گھن آوݨ اچ معاونت ݙتی۔ترجمان دفترِ خارجہ آکھیا جو کمیونٹی سروس دے حوالے نال اساں خصوصی اقدامات کریندے خصوصاً ایران توں پاکستانی شہریاں دے انخلاء تے خطے دے مختلف جہیں تے پتھے آپݨے شہریاں دی مدد کیتے اقدامات کیتن۔ انھاں آکھیا جو مرکزی سطح تے وزارتِ خارجہ دا کرائسس مینجمنٹ یونٹ چووی گھنٹے فعال اے، ٻاہرلے ملک پاکستان دے سفارتی مشنز اچ خصوصی سہولت ڈیسک بݨائے ڳئن تاں جو پھتے پاکستانی شہریاں کوں ویزا سہولت، لاجسٹکس تے سفری انتظامات اچ مدد ݙتی ونڄ سڳے۔انھاں آکھیا جو پاکستان دے سفارتی مشنز میزبان حکومتاں دے نال نیڑے رابطے اچ ہن تاں جو پاکستانی کمیونٹی کیتے ضروری قونصلر سہولتاں یقینی بݨائیاں ونڄ سڳن۔ ترجمان آکھیا جو وزیراعظم کمیونٹی دی معاونت دے انھاں اقدامات دے حوالے نال واضح ہدایات جاری کیتن، اساں نائب وزیراعظم تے وزیرِ خارجہ دی مکمل رہنمائی تے تعاون نال انھاں ہدایات تے عملدرآمد کریندے پیوں۔ انھاں مزید آکھیا جو سفارتی مشنز خصوصی موبائل ایپلی کیشنز، رجسٹریشن پورٹلز تے ہیلپ لائنز وی شروع کیتن تاں جو وقتی رابطہ تے مدد ݙتی ونڄ سڳے۔