وزیراعظم شہباز شریف تے سعودی ولی عہد دی ملاقات، خطے اچ امن تے استحکام کوں فروغ ݙیوݨ تے اتفاق

جدہ۔ 13 مارچ (اے پی پی) پاکستان تے سعودی عرب خطے اچ امن تے استحکام دے فروغ کیتے مشترکہ طور تے کم جاری رکھݨ تے اتفاق کیتے۔ وزیراعظم محمد شہباز شریف سعودی عرب دے ولی عہد تے وزیراعظم شہزادہ محمد بن سلمان بن عبدالعزیز آل سعود نال ملاقات کیتی جیندے اچ نائب وزیراعظم تے وزیرِ خارجہ سینیٹر محمد اسحاق ڈار تے چیف آف آرمی سٹاف تے چیف آف ڈیفنس فورسز فیلڈ مارشل سید عاصم منیر وی موجود ہن۔ وزیراعظم آفس دے میڈیا ونگ توں جاری بیان دے مطابق ملاقات اچ وزیراعظم خادم الحرمین الشریفین شاہ سلمان بن عبدالعزیز آل سعود کیتے نیک تمنائیں دا اظہار کیتا اتے پاکستان کیتے سعودی عرب دی طویل المدتی حمایت دی ستائش کیتی۔ وزیراعظم انھاں اوکھے حالات اچ سعودی عرب دے نال پاکستان دی مکمل یکجہتی تے بھرپور حمایت دا اعادہ کیتا۔ ݙوہیں رہنماواں وچال خطے اچ اڄوکی پیش رفت تے تفصیلی ڳالھ کیتی اتے ایں ڳالھ تے اتفاق کیتا ڳیا جو خطے اچ امن تے استحکام دے فروغ کیتے مشترکہ طور تے کم جاری رکھیا ویسی۔ وزیراعظم ولی عہد کوں یقین ݙوایا جو پاکستان ہمیشہ سعودی عرب دے نال مضبوطی نال کھڑا رہسی اتے خطے اچ امن دے مشترکہ مقصد دے حصول کیتے ہر ممکن کوشش جاری رکھیسی، جیندے نال فائدہ تھیسی۔