صدر مملکت آصف علی زرداری دی افغان طالبان دے ڈرون حملیں دی شدید مذمت

اسلام آباد (اے پی پی) صدر مملکت آصف علی زرداری افغان طالبان عناصر ولوں گزریل ݙینھ کیتے ڳئے انھاں ڈرون حملیں دی شدید مذمت کیتی اے جنھاں دا مقصد پاکستان دے شہری علاقیں کوں نشانہ بݨاوݨ ہئی۔ ایوانِ صدر دے پریس ونگ توں جاری بیان موجب صدر مملکت آکھیے افغانستان وچ دہشت تے طاقت دے ذریعے قائم کیتی ڳئی غیر قانونی حکومت مسلسل اپݨے ایں وعدے توں پھر دی پئی اے جو او دہشت گرد گروہیں کوں محفوظ پناہ گاہیں کائناں ݙیسی ، تے ہݨ انھاں اسلامی دنیا دی ہک وݙی فوجی طاقت کوں اشتعال ݙیوݨ دی جرات وی کیتی اے۔صدر مملکت آکھیے ہݨ جݙݨ افغان دہشت گرد رجیم ساݙے دوست ملکاں نال مذاکرات چاہندے، انھاں ساݙے شہریں کوں نشانہ بݨاوݨ دی کوشش کر تے سرخ لکیر عبور کیتی اے، جݙݨ جو پاکستان خلیجی خطے تے مغربی ایشیا وچ امن و استحکام کوں ودھاوݨ دیاں کوششاں وچ مصروف اے۔ انھاں آکھیا جو طالبان دی ناجائز تے دہشت گرد حکومت ایں سرخ لکیر کوں عبور کرتے اپݨے اتے سنگین نتائج مسلط کیتن۔صدر مملکت کوئٹہ، کوہاٹ تے راولپنڈی وچ ڈرون دے ملبے نال زخمی تھیوݨ آلے ٻالیں تے ٻئے شہریاں دی وقتی صحت یابی کیتے نیک خواہشات دا اظہار کیتے۔ انھاں ایں ڳالھ دا وی اعادہ کیتے پاکستان دیاں مسلح افواج تے سکیورٹی ادارے ملک دے دفاع تے ایندے عوام دے تحفظ کیتے پوری طرح پرعزم ہن۔