برفانی بِھکل ڈھݨ ، لینڈ سلائیڈنگ تے سفری رکاوٹاں ودھݨ دا ݙر اے، نیشنل ڈیزاسٹر مینجمنٹ اتھارٹی

اسلام آباد۔14مارچ(اے پی پی) نیشنل ڈیزاسٹر مینجمنٹ اتھارٹی (این ڈی ایم اے) عوام کوں احتیاط ورتݨ دا مشورہ ݙیندے آکھیے 16 مارچ تئیں شمالی پاکستان وچ مینھ تے برف باری متوقع اے، جیندے نال برفانی بِھکل ڈھݨ ، لینڈ سلائیڈنگ تے سفری رکاوٹاں دے ݙر اچ ودھارا تھی سڳدے۔ ترجمان این ڈی ایم اے اپݨے ہک خصوصی پیغام وچ مقامی انتظامیہ تے متعلقہ محکمیں کوں تیار رہݨ تے چوکس نگرانی برقرار رکھݨ دی ہدایت کیتی اے۔ انھاں آکھیا جو برف باری تے مینھ دے نویں سلسلے دے دوران برفانی جھیلاں دے پھٹݨ پاروں چھل تے پہاڑی علاقیں اچ لینڈ سلائیڈنگ دا خطرہ ودھ سڳدے۔ انھاں مزید آکھیا جو ہفتے توں 16 مارچ تئیں گلگت بلتستان، آزاد کشمیر تے خیبر پختونخوا دے اُتلے ضلعے موسمی نظام متاثر تھیوݨ دا امکان اے۔ پیشگوئی موجب گلگت، استور، دیامر، اسکردو، ہنزہ، غذر تے شگر سودھے کئی علاقیں وچ مینھ تے پہاڑاں تے برف باری دا امکان اے۔ آزاد کشمیر دے کجھ علاقیں مظفرآباد، باغ، پونچھ، حویلی، کوٹلی، بھمبر تے وادی نیلم کیتے وی ایجھی صورتحال دی پیشگوئی کیتی ڳئی اے۔ خیبر پختونخوا دے کجھ حصیں بالخصوص چترال، دیر، سوات، کالام تے بٹگرام وچ کھمݨ گاجاں نال مینھ وسݨ دا امکان اے ۔ این ڈی ایم اے چتاوݨی ݙتی اے چترال، سوات، کوہستان، گلگت، استور تے اسکردو جیھے ضلعے وچ تکھے گلیشیئر پگھلݨ نال اچاچیت چھل آوݨ دا ݙر وی ہے ۔ شاہراہِ قراقرم سودھے اہم پہاڑی رستے وی متاثر تھی سڳدن۔