حکومتی بچت اقدامات توں حاصل رقم عوامی ریلیف کیتے استعمال تھیسی، وزیرِ اعظم دی زیرِ صدارت اجلاس وچ فیصلہ

اسلام آباد۔14مارچ(اے پی پی) وزیرِاعظم محمد شہباز شریف دی زیرِ صدارت اجلاس وچ فیصلہ کیتا ڳئے حکومتی بچت اقدامات توں حاصل تھیوݨ الی رقم عوامی ریلیف کیتے استعمال کیتی ویسی۔ عوامی ریلیف تے خرچ کرݨ کیتے سرکاری ملازمین دی طرح سرکاری ملکیتی اداریں تے حکومتی سرپرستی وچ خودمختار اداریں دے ملازمین دیاں تنخواہیں وچوں درجہ بہ درجہ 5 توں 30 فیصد تئیں کٹوتی تھیسی۔ قانون نافذ کرݨ الے اداریں تے ایف بی آر تے ہفتہ وار چار ڈینھ کم دا اطلاق کائناں تھیسی، او اپݨے پراݨے طریقہ کار دے موجب فرائض سرانجام ݙیسن۔ جݙاں جو وزیرِاعظم دنیا وچ پاکستانی سفارتخانیں کوں 23 مارچ دی تقریبات کوں سادگی نال مناوݨ دی ہدایت کیتی اے۔ سرکاری افسران، وزراء، وزرائے مملکت تے معاونینِ خصوصی دے ٻاہرلے دوریں تے مکمل پابندی رہسی۔ وزیرِاعظم دفتر دے میڈیا ونگ توں جاری بیان موجب وزیرِاعظم محمد شہباز شریف دی زیرِ صدارت خطے وچ صورتحال پاروں پٹرولیم مصنوعات دیاں قیمتاں تے اثر تے حکومتی بچت اقدامات تے عملدرآمد متعلق جائزہ اجلاس تھیا۔ اجلاس وچ وفاقی وزراء عطا اللہ تارڑ، محمد اورنگزیب، علی پرویز ملک، وزیرِ مملکت بلال اظہر کیانی، چیئرمین ایف بی آر تے متعلقہ اعلیٰ حکام شرکت کیتی۔ اجلاس کوں ݙسایا ڳیا جوآندے ݙو مہینے سارے محکمیں دی سرکاری گاݙیاں کوں ملݨ الے تیل وچ 50 فیصد کٹوتی تے سرکاری گاݙیاں دے 60 فیصد گراؤنڈ کیتے ونڄݨ دے فیصلے دے حوالے نال تھرڈ پارٹی آڈٹ کروایا ویسی۔ وزیرِاعظم ہدایت کیتی جو سادگی تے کفایت شعاری دے سارے احکامات تے اقدامات تے عملدرآمد تے نگرانی متعلقہ سیکریٹریز خود کریسن تے روزانہ دی بنیاد تے جائزہ کمیٹی کوں رپورٹ پیش کریسن۔