وزارتِ اطلاعات ولوں افغان طالبان دے کوڑدا پردہ فاش

اسلام آباد (اے پی پی) افغان طالبان رجیم دی نام نہاد وزارتِ دفاع دا بے بنیاد کوڑ تے پروپیگنڈا ہک واری ول بے نقاب تھی ڳئے۔ افغان طالبان ولوں پاکستانی پوسٹاں تے قبضے دے دعویں تے ضیان دے اعداد و شمار وچ کوئی صداقت کائنی۔ ہفتے کوں وزارتِ اطلاعات و نشریات ولوں جاری بیان وچ آکھیا ڳئے جو اے افغان عوام کوں بے وقوف بݨاوݨ کیتے گھڑی ڳئی کوڑی کہانیاں ہن۔ وزارتِ اطلاعات افغان طالبان تے انھاں دی پراکسی ‘فتنہ الخوارج’ دے نقصانات دی تفصیلات باقاعدگی نال پیش کریندی پئی اے تے جتھاں ضرورت ہووے، میڈیا کوں تصویراں تے ویڈیوز وی ݙتیاں ویندیاں پئن۔ بیان وچ مزید آکھیا ڳیا جو افغانستان دے اندر دہشت گرداں دے ٹھکاݨیں کوں نشانہ بݨاوݨ دی مصدقہ اطلاعات وقتی ݙتیاں ویندیاں پئن، تے طالبان دے کوڑےدعوے صرف ہک دیوانے دا خواب ہن۔