اسلاموفوبیا دے خلاف سانجھے اقدامات کیتے ونڄن، چیئرمین سینیٹ دا عالمی برادری تے زور

اسلام آباد۔15مارچ(اے پی پی) اسلاموفوبیا دے خلاف عالمی ݙینھ دے موقع تے چیئرمین سینیٹ سید یوسف رضا گیلانی عالمی برادری تے زور ݙتے دنیا وچ مسلماناں دے خلاف ودھدی ہوئی نفرت، تعصب تے امتیازی رویں دے تدارک کیتے سانجھے اقدامات کیتے ونڄن۔ سینیٹ سیکرٹریٹ توں جاری اپݨے پیغام وچ انھاں آکھیا جو مختلف معاشریں وچ اسلاموفوبیا دا تسلسل مساوات، انسانی وقار تے مذہبی آزادی دے انھاں بنیادی اصولاں کوں نقصان پچیندے پئن جیڑھے بین الاقوامی قوانین تے اقوامِ متحدہ دے چارٹر وچ درج ہن۔ انھاں تشویش دا اظہار کریندے آکھیا جو دنیا دے مختلف خطیں وچ مسلماناں تے عبادت گاہیں دے خلاف نفرت انگیز تقاریر، امتیازی سلوک تے حملیں دے واقعات سامݨے آندے پئن جیڑھے پرامن بقائے باہمی تے سماجی ہم آہنگی کیتے ہک سنگین چیلنج ہن۔ چیئرمین سینیٹ آکھیا جو اسلام ہک ایجھا مذہب اے جیڑھا امن تے انصاف دی تعلیم ݙیندے ۔انھاں ایں ڳالھ تے زور ݙتا جو تہذیباں تے مذاہب وچال برداشت تے سانجھے احترام دا ودھارا عالمی استحکام تے ہم آہنگی کیتے ناگزیر اے۔ انھاں حکومتاں، پارلیماناں، بین الاقوامی تنظیماں تے سول سوسائٹی تے زور ݙتا جو مذہبی عدم برداشت دے خاتمے تے ساریاں برادریاں دے حقوق و آزادیں دے تحفظ کیتے موثر قانون سازی، پالیسی تے ادارہ جاتی اقدامات کوں مضبوط بݨاون۔ سید یوسف رضا گیلانی بین المذاہب ہم آہنگی، سارے مذاہب دے احترام تے اقلیتاں دے حقوق دے تحفظ کیتے پاکستان دے اصولی عزم دا اعادہ کریندے آکھیا جو اسلاموفوبیا دا مقابلہ کرݨ پوری عالمی برادری دی مشترکہ ذمہ واری اے۔ انھاں عالمی برادری تے زور ݙتا جو سانجھی تفہیم، شمولیت تے تنوع دے احترام دے ودھارے کیتے اجتماعی کوششاں کیتیاں ونڄن تاں جو ہک زیادہ پرامن تے منصفانہ دنیا دی بنیاد رکھی ونڄ سڳے۔