وزیرِاعظم دی کھاوݨ پیوݨ دیاں چیزاں دی طلب و رسد تے نظر رکھݨ دی ہدایت

لاہور۔15مارچ(اے پی پی)وزیرِاعظم محمد شہباز شریف ملکی غذائی ضرورتاں کیتے کھاوݨ پیوݨ دیاں چیزاں دی طلب و رسد تے نظر رکھݨ تے پاکستانی غذائی ضرورتاں کوں متاثر کیتے بغیر اضافی کھاوݨ پیوݨ دیاں چیزاں خلیجی ملکاں کوں برآمد کرݨ کیتے جامع لائحہ عمل بݨاوݨ دی ہدایت کیتی اے۔ وزیرِاعظم محمد شہباز شریف دی زیرِ صدارت خطے دی بدلدی صورتحال پاروں ملک وچ غذائی صورتحال تے اضافی کھاوݨ پیوݨ دیاں چیزاں دی برآمدات تے جائزہ اجلاس تھیا۔ وزیرِاعظم دفتر دے میڈیا ونگ توں جاری بیان موجب وزیرِاعظم اجلاس توں خطاب کریندے ہدایت کیتی جو ملکی غذائی ضرورتاں کیتے کھاوݨ پیوݨ دیاں چیزاں دی طلب و رسد دی مکمل نگرانی کیتی ونڄے۔ وزیرِاعظم کوں بریفنگ وچ ݙسایا ڳیا جو پاکستان وچ کھاوݨ پیو دیاں چیزاں دا وافر ذخیرہ موجود اے، کہیں وی چیز دی قلت کائنی۔وزیرِاعظم آکھیا جو عالمی سپلائی چینز متاثر تھیوݨ نال خطے وچ پاکستانی مصنوعات دی برآمد دی استعداد وچ ودھارا تھئے۔ انھاں ہدایت کیتی جو موجودہ صورتحال وچ خلیجی ملکاں کوں درکار کھاوݨ پیوݨ دیاں چیزاں تے انھاں دے غذائی تحفظ دا خیال رکھیا ونڄے۔ پاکستانی غذائی ضرورتاں کوں متاثر کیتے بغیر وافر مقدار وچ موجود چیزاں دی خلیجی ملکاں وچ برآمد کیتے جامع لائحہ عمل تشکیل ݙتا ونڄے۔ وزیرِاعظم آکھیا جو بھرا خلیجی ملکاں وچ کھاوݨ پیوݨ دیاں چیزاں برآمد کرݨ ویلھے اعلیٰ معیار یقینی بݨایا ونڄے۔ وزیراعظم ہدایت کیتی جو پی این ایس سی بحری رستے دے ذریعے بھرا خلیجی ملکاں وچ کھاوݨ پیوݨ دیاں چیزاں برآمد کرݨ کیتے ضروری اقدامات کرے۔اجلاس کوں ملک وچ موجود ذخیرے تے پیداوار تے بریفنگ ݙتی ڳئی جیندے وچ ݙسایا ڳیا جو پاکستان دے زرعی شعبے بشمول زرعی اجناس، گوشت، پولٹری، ڈیری تے سی-فوڈ وچ برآمد دی وسیع استعداد موجود اے۔ وزیرِاعظم ایں حوالے نال کمیٹی بݨاوݨ دی ہدایت کر ݙتی اے جیڑھی روزانہ دی بنیاد تے صورتحال دا جائزہ گھنسی۔ وزیرِاعظم خلیجی ملکاں وچ تعینات سفیراں تے ٹریڈ افسراں کوں متحرک رہݨ دی ہدایت کیتی۔ اجلاس وچ نائب وزیرِ اعظم تے وزیرِ خارجہ اسحاق ڈار، وفاقی وزراء جام کمال خان، رانا تنویر حسین، احد خان چیمہ، معاونِ خصوصی ہارون اختر تے متعلقہ اعلیٰ حکام شرکت کیتی۔ اجلاس وچ صوبائی چیف سیکریٹریز تے متعلقہ شعبے دی نجی ایسوسی ایشنز دے نمائندیں وی شرکت کیتی۔