1973 دا آئین پاکستان دی جمہوری سنڄاݨ تے قومی وحدت دا مظہر اے، چیئرمین سینیٹ

اسلام آباد۔ 10 اپریل (اے پی پی) چیئرمین سینیٹ سید یوسف رضا گیلانی آکھیا جو 1973 دا آئین پاکستان دی جمہوری سنڄاݨ تے قومی وحدت دا مظہر اے، اے عوام دے بنیادی حقوق دے تحفظ دی ضمانت ݙیندے ، آئین محض قانونی دستاویز کائنی بلکہ قومی شعور تے جمہوری عزم دی عکاسی اے۔ ملکی استحکام کیتے آئین دی بالادستی تے قانون دی حکمرانی ضروری اے، 10 اپریل 1973 کوں قوم متفقہ آئین اختیار کر تے وفاق کوں مضبوط کیتے۔ یومِ دستور دے موقع تے سینیٹ سیکرٹریٹ میڈیا ڈائریکٹوریٹ توں جاری سنیھے اچ چیئرمین سید یوسف رضا گیلانی آکھیا جو 1973 دے آئین صوبیاں دے حقوق دا تحفظ اتے اداریاں وچال توازن قائم کیتا، ایں ویلھے دی قیادت بالخصوص شہید ذوالفقار علی بھٹو متفقہ آئین تشکیل ݙتا، ذوالفقار علی بھٹو شہید دی قیادت ملک کوں جامع تے مؤثر آئینی فریم ورک فراہم کیتے۔ چیئرمین سینیٹ آکھیا جو آئین غریباں، تریمتیں تے اقلیتاں دے حقوق دا ضامن اے، اے ریاستی اختیارات دی تقسیم، احتساب تے عوامی نمائندگی کوں یقینی بݨیندے ، پارلیمنٹ مؤثر تے شفاف قانون سازی کیتے پرعزم اے۔ چیئرمین سینیٹ آکھیا جو مؤثر سفارتکاری توں عالمی سطح تے پاکستان دا مثبت تشخص اجاگر تھیا، سیاسی جماعتاں قومی مفاد اچ اتحاد تے آئین دی پاسداری کوں ترجیح ݙیون، قومی ترقی دا دارومدار آئینی اصولاں نال وابستگی اچ اے۔ سید یوسف رضا گیلانی آکھیا جو نوجوان آئین، حقوق تے جمہوری ذمہ واریاں توں آگاہی حاصل کرن، باشعور نوجوان نسل پاکستان دے روشن مستقبل دی ضمانت اے۔