نویں آٹو پالیسی وقتی متعارف کروائی ویسے، ہارون اختر خان

اسلام آباد /لاہور۔19 ستمبر(اے پی پی) وزیراعظم دے مشیر صنعت و پیداوار ہارون اختر خان آکھیے جو حکومت وقتی نویں آٹو پالیسی متعارف کرویسی، جیندے اچ آٹو پارٹس مینوفیکچررز سودھے سارے سٹیک ہولڈرز کیتے مراعات شامل ہوسن۔ وزارتِ صنعت و پیداوار توں جاری اعلامیے موجب پاکستان انٹرنیشنل آٹو شو 2026ء دے افتتاح دے موقع تے میڈیا نال ڳالھ کریندے انہاں آکھیا جو وزیراعظم محمد شہباز شریف دے وژن دے تحت حکومت آٹو پارٹس دی برآمدات ودھاوݨ تے مقامی صنعت کوں عالمی منڈیاں تئیں رسائی ݙیواوݨ کیتے اقدامات کریندی پئی اے۔ سمیڈا، پاکستان ایسوسی ایشن آف آٹوموٹیو پارٹس اینڈ ایکسسریز مینوفیکچررز دے اشتراک نال 21ویں پاکستان انٹرنیشنل آٹو شو 2026ء اچ بطور اسٹریٹجک پارٹنر شرکت کریندا پئے۔ ترائے ݙینھ وار دی نمائش لاہور ایکسپو سینٹر اچ جاری اے، جیندے اچ ملکی و غیر ملکی صنعت کار، کاروباری شخصیات تے مندوبین شریک ہن۔ ایں موقع تے ہارون اختر خان آکھیا جو پاکستان دی آٹوموٹیو صنعت اچ ترقی تے برآمدات دے وسیع امکانات موجود ہن۔ پاکستان آٹو شو مقامی مینوفیکچرنگ، جدت تے سرمایہ کاری دے ودھارے کیتے اہم پلیٹ فارم اے۔ انہاں سمیڈا کوں ہدایت کیتی جو او PAAPAM تے شعبے نال وابستہ MSMEs کوں بھرپور معاونت ݙیوے تاں جو او نویں ملکی و عالمی منڈیاں تئیں رسائی حاصل کرسڳن۔ سمیڈا دی چیف ایگزیکٹو افسر نادیہ جہانگیر سیٹھ آکھیا جو آٹوموٹیو شعبہ ایس ایم ایز دی قیادت اچ صنعتی ترقی دی وݙی صلاحیت رکھیندے۔ سمیڈا، پاپام دے نال شراکت داری دے ذریعے ایم ایس ایم ایز کوں جدید ٹیکنالوجی، کاروباری شراکت داری تے ملکی و عالمی مارکیٹاں تئیں رسائی دے موقع ݙیندا پئے۔